arin JS
Home page Ad

थौं विश्व प्रेस स्वतन्त्रता दिवस हनाच्वन

Jheegu Sah – Birajkaji Rajopadhyaya,    २०७८ बैशाख २०, सोमबार    वर्गीकृत राष्ट्रिय

थौं मे ३ तारीख, प्रेसकर्मीतय् नितिं थौंया दिन विशेष खः । छायधाःसां थौं विश्व प्रेस स्वतन्त्रता दिवस खः ।

हरेक दँय्  मे ३ तारीखया दिनय् हलिंन्यंकया प्रेसकर्मीतय् थीथी ज्याझ्वः यानाः विश्व प्रेस स्वतन्त्रता दिवस हनेगु याइ । थुगुसी नं ‘सार्वजनिक सम्पत्तिया रुपय् सूचना’ धइगु मूल नारालिसें थुगु दिवस हनाच्वंगु दु ।

थौंया दिनय् अभिव्यक्ती स्वतन्त्रता व नागरिक अधिकारया पक्षय् सः थ्वयेकुसें ज्याझ्वःत यायेगु याइ । तर हलिंन्यंक कोभिड महामारीया अवस्थाय् यक्व हे देशय् भौतिक उपस्थितीया दथुइ औपचारिक ज्याझ्वः याये फयाच्वंगु मदु । थुगुसी नेपाल लगायत मेमेगु देशय् नं थुगु दिवस भर्च्युअल ज्याझ्वलय् हे लिकुनीगु खनेदु ।

नेपालय् थौं दिवसया सन्दर्भय् युनेस्कोलिसेया सहकार्यय् नेपाल पत्रकार महासंघं भर्च्युअल रूपं अन्तरक्रिया ज्याझ्वः यायेत्यंगु दु । ज्याझ्वलय् नेपालया थुगुसीया प्रेस स्वतन्त्रता व पत्रकार सुरक्षाया अवस्थाया विषय कःघानातःगु प्रतिवेदन सार्वजनिक यायेत्यंगु दु ।

दिवसया ज्याझ्वः भर्च्युअल रुपं जुयाच्वंसां संक्रमणया जोखिम फयाः अग्रपंक्तिइ खटे जुयाः प्रेसकर्मीतयसं थौं नं थःगु कर्तव्य पूवंकाच्वंगु हे दु ।

अभिव्यक्ति स्वतन्त्रताया खँ ल्ह्वँल्हं हे प्रेसकर्मीयात समाचार च्वःगु खँय् दण्डित यायेगु ज्या नं झीगु दथुइ जुयाच्वंगु दुसा संक्रमणं सुरक्षित जुइत सूचना प्रवाह यायां पत्रकार थः हे संक्रमित जुइमालाच्वंगु नं झीसं खनाच्वनागु दु ।

सन् १९९३ मे ३ कुन्हु नामिबियाया विण्डहकय् जूगु सम्मेलनं जारी याःगु घोषणापत्रय् प्रेस अले अभिव्यक्ति स्वन्त्रताया पक्षय् प्रतिबद्धता न्ह्यथंगु दिंया लुमन्तिइ मे ३ यात युनेस्कोया आह्वानय् विश्व प्रेस स्वतन्त्रता दिवसया रूपं हनेगु यानाच्वंगु दु ।

Detail page ad