arin JS
Home page Ad

महानगरं दाफा गुरुपिन्त हन

Jheegu Sah – Birajkaji Rajopadhyaya,    २०७८ पौष ९, शुक्रबार    वर्गीकृत समाज

येँ महानगरं ४५म्ह दाफा गुरुपिन्त हंगु दु । २७क्वःगु महानगर दिवस ०७८ या लसताय् थौं खुसिबुँइ जूगु ज्याझ्वलय् गुरुपिन्त मेयर विद्यासुन्दर शाक्यं हनादीगु खः ।

ज्याझ्वलय् नवासें मेयर शाक्यं वर्तमानलिसें पूर्व कुमारी, गणेश व भैरवया नं मासिक भत्ता थकयागु जानकारी बियादिल ।

‘परम्पराप्रतिया आकर्षण वसंस्कारया निरन्तरताया लागिं मुक्कं ई बीपिन्त भत्ताया व्यवस्था यानागु खः, थुकिं परम्परागत बाजंया संरक्षण व प्रशिक्षण, जात्रा, पर्व, संस्कार व संस्कृतिया निरन्तरताय् हःपाः जुइ’ शाक्यं धयादिल ।

ज्याझ्वलय् कामपा १८ वडाया नायः लिसें सम्पदा तथा पर्यटन समितिया कजि न्हुच्छेकाजी महर्जनं महानगरया परम्परागत म्हसिकायात ल्यंकातय्त बाजं गुरुतय् सीप व कलायात पुस्तान्तरण यायेमाःगु व थःपिन्सं थुकिया लागिं कुतः यानाच्वनागु धयादिल ।

सम्मान लःल्हानाकासें गुरुपिं ज्योती शाक्य व राजभाइ ज्यापुं महानगरं ब्यूगु ग्वाहालिं परम्परागत बाजं संरक्षण, वादन प्रशिक्षणया ज्याझ्वःत अप्वयावःगु बिचाः तयादिल । महानगरया लगानीं परम्परा पुस्तान्तरण यायेत अःपूगु दाफा गुरुपिनि धापू खः ।

Detail page ad