arin JS
Home page Ad

यलया कुमारीया आसन हिल

Jheegu Sah – Aakash Rajopadhyaya,    २०७८ बैशाख ३०, बिहिबार    वर्गीकृत तजिलजि

यलया जीवित देवी कुमारीया आसन ८० दँ लिपा ह्यूगु दु । न्हिं न्हिं पूजाया लागिं कुमारी बिराजमान जुयाबिज्याइगु आसन जीर्ण जूगुलिं ह्यूगु खः ।

यलया हःखास्थित रत्नाकर महाविहारय् विहारया आजुपिन्सं बौद्ध पराम्परा कथं क्षमा पूजा यानाः न्हूगु आसन कुमारीयात लःल्हात ।

लुँ व वहः सियातःगु न्हूगु कलात्मक आसन वरिष्ठ कलाकार प्रचण्ड शाक्यं दयेकादीगु खः ।

यल महानगरपालिका– १६ वडा ज्याकूया ग्वाहालिइ कुमारीया न्हूगु आसन दयेकूगु खः ।

‘कुमारीया आसन जीर्ण जूगु खबर वयेधुंकाः वडाध्यक्ष निर्मल रत्न शाक्यं आर्थिक दँ २०७६/०७७ या बजेटय् आसन जीर्णोद्वारया लागिं ५ लख तका फ्यानादीगु खः ’ वडाया सदस्य शुप्रभा शाक्यं धयादिल ।

पुलांगु आसन हर्खराज बज्राचार्य व वयकःया परिवारं नेपाल संवत् १०६१ स कुमारीयात देछानादीगु खः ।

न्हूगु आसनय् वर्तमान कुमारी निहिरा बज्राचार्य बिज्यानादी ।

‘न्हापा कुमारी बिज्याइगु आसन जीर्ण जुयाः कुमारी फ्यतुइत तकं मछिं, आः न्हूगु आसनय् कुमारी माजु याउँक व अःपुक विराजमान जुयाबिज्याइ’ वर्तमान कुमारी निहिराया अबुजु निरोज बज्राचार्यं धयादिल ।

Detail page ad