arin JS
Home page Ad

स्वयम्भुया झिंन्हयखा छेँया पुनर्निर्माण लिपा बैशाख १३ गते लःल्हाइगु

Jheegu Sah – Birajkaji Rajopadhyaya,    २०७८ बैशाख १०, शुक्रबार    वर्गीकृत समाज

येँया स्वयम्भू महाचैत्य स्तुप परिसरया कर्मराज महाविहार (गुम्बा) लिसें झिन्हयखा छेँया पुनर्निर्माण क्वचाःगु दु ।

थौं स्वयम्भु पुनर्निर्माण समितिं येँय् पत्रकार सम्मेलन यानाः ०७२ सालया भुखाचं क्षतिग्रस्त कर्मराज महाविहार (गुम्बा) या पुनर्निर्माण क्वचाःगु जानकारी ब्यूगु खः ।

पत्रकार सम्मेलनय् कर्मराज महाविहारलिसें सलंसःदँ न्ह्यःनिसें स्वयम्भुया पुजारी बुद्धाचार्य वंशया परिवारत च्वनावयाच्वंगु झिन्हयखाः छेँया नं पुनःनिर्माण क्वचाःगु धाःगु खः ।

स्वयम्भु पुनर्निर्माण समितिया अध्यक्षलिसें येँय्  महानगरपालिकाया वडा १५ या अध्यक्ष ईश्वरमान डंगोलं अन च्वंगु छेँय् एकीकरण याना एकिकृत वस्ती प्रणालीपाखें सञ्चालन याःगु थ्व ये महानगरपालिकाया न्हापांगु योजना जूगु धयादिल ।

डंगोलया धापू कथं पुरातत्व विभागलिसे समन्वय याना छेँयात छगू हे शैलीइ तयार याःगु खःसा उगु छेँत मी मदइगु व पुस्ताय् जक हक हस्तान्तरण जुइ ।

थनया छेँतयत एकीकरण यानाः महानगरं छगू हे भवनया नक्सा स्वीकृत याःगु खँ नं पत्रकार सम्मेलनय् जानकारी ब्यूगु खः ।

अन च्वंगु दक्व संरचनाया पुनर्निर्माण यायेत महानगरया कार्यपालिका बैठकं निदँ न्ह्यः येँय् महानगरपालिकाया प्रवक्तालिसें वडा १५ या अध्यक्ष डंगोलया अध्यक्षताय् ‘स्वयम्भु पुनर्निर्माण समिति’ गठन याःगु खः । स्वयम्भु पुननिर्माण समितिं हे थ्व पुनर्निर्माणया ज्या क्वचायेकुगु खः ।

पुनर्निर्माणया लागि करीब १५ करोड तकाया लागत अनुमान याःगु खःसा १३ करोड ५२ लाख तकाय् पुननिर्माण सम्पन्न जुइगु चरणय् थ्यंगु दु । उगु लागतमध्ये ३० प्रतिशत छेँ थुवालं तःगु खःसा ल्यं दनिगु ब्व अवतारी गुरु कर्मपा थिन्ले थाय दोर्जें तयादीगु खः ।

थुकिया लागि वडा ज्याकू व कर्मराज महाविहारदथुइ सम्झौता जूगु खः । पुनर्निर्माण जूगु छेँ वइगु बैशाख १३ गते हस्तातरण याइगु ज्याझ्वः दु ।

Detail page ad