arin JS
Home page Ad

म्यानमारय् सुकीयात ज्वनाः सेनां यात ‘कू’

Jheegu Sah – मिला राजाेपाध्याय,    २०७७ माघ १९, सोमबार    वर्गीकृत अन्तर्राष्ट्रिय

म्यानमारय् आङ साङ सुकीयात ज्वनाः सेनां सत्ता थःगु ल्हातय् काःगु दु । सेनां कू याःगुयालिसें म्यानमारया शासन सत्ता आः प्रधान सेनापति मिन आङ हल्याइङं थःगु ल्हातिइ काःगु दु ।

सेनां सत्तारुढ पार्टी नेशनल लिग फर डेमोक्रेसी (एनएलडी) या नेतृ आङ सान सूकीलिसें राष्ट्रपतित विन मिन्टलिसेंयात नेतातयत नं ज्वंगु दु ।

उकिया नापं सेनां म्यानमारय् दच्छिया लागिं संकटकाल तकंया घोषणा याःगु दु । सेना समर्थित टेलिभिजनपाखें भिडियो सन्देश जारी यासें सेनां दच्छिया लागिं संकटकाल घोषणा याःगु खः ।

उगु भिडियो सन्देशय् नोभेम्बरय् क्वचाःगु चुनावय् जूगु धाँधलीया लिसलय् नेतातयत ज्वनागु सेनां न्ह्यथंगु दु ।

उकिया नापं, सेनां राजधानी नेउपिटाउलिसें म्यानमारया प्रमुख शहरय् टेलिफोन, इन्टरनेटया सेवा तकं बन्द याःगु दु ।

म्यानमारय् नोभेम्बरय् क्वचाःगु निर्वाचनया विषययात सेना व सरकार दथुइ तनाव जुयाच्वंगु दुगु खः ।

निर्वाचन एनएलडीें संसदया ४सः व ७६ मध्ये ३ सः व ९६ सिटय् त्याकाः बहुमत हःगु खःसा सैनिक समर्थित युनियन सोलिडारिटी एन्ड डेभलपमेन्ट पार्टीं ३३ सिट जक त्याकेफुगु खः । निर्वाचनया लिच्वः सार्वजनिक जुयाकथं सेनां धाँधली जूगु दावी यानावःगु खः ।

म्यानमारय् सन् १९६२ निसें २०११ तक्क सैनिक शासन दुगु खः । सन् २०११ तक्क सक्रिय सैनिक शासन जुयाच्वंगु म्यानमारय् लिपा सूकीं आंशिक प्रजातन्त्र स्वीकार यासें निर्वाचनय् ब्वति काःगु खः ।

Detail page ad