ख्वपया ब्यासी त्वालय् खजुरीको पसल चाःगु दु ।

इजरायलय् १० दँ च्वनाः नेपाः लिहांवःम्ह नरेश श्रेष्ठं ब्यासीइ थीथी दैनिक उपभोग्य ज्वलंया ग्रोशरी स्टोर चायेकादीगु खः ।

‘१० दँ इजरायल च्वनाः लिहांवया, छुं कमे नं यानावया धायेमाल तर, आः थःगु हे चाय् छुं याये धकाः नेपाः लिहांवयाः थःगु हे व्यवसाय न्ह्याकागु दु’ श्रेष्ठं धयादिल ।

करीब ५० लाख तकाया लगानीइ व्यवसाय न्ह्याकागु श्रेष्ठं जानकारी बियादिल ।

खजुरीको ब्रान्डया शाखाया रुपं चायेकूगु पसःया नां हे खजुरीको पसल तःगु दु । उगु पसलय् न्हियान्हिथंयात माःगु नसा ज्वलंनापं दैनिक उपभोग्य ज्वलंत तयातःगु दु ।

पसःया उलेज्याया लसताय् १० प्रतिशततक्क छुटया सुविधा नं बियातःगु दु । शनिबाःनिसें चाःगु पसलय् १०न्हुया लागिं छुटया सुविधा बीगु धाःगु दु ।

लिसें थुगु हे स्टोरं खजुरीको ब्रान्डया मेम्बरसीप नं दयेकेफइ । मेम्बरतय्सं खजुरीको ब्रान्डया हरेक शाखां छुटलिसें ई कथं वइगु थीथी अफरया सुविधा नं कायेफइ ।