arin JS
Home page Ad

शताब्दी पुरूष सत्यमोहन जोशी अस्पतालं डिस्चार्ज

Jheegu Sah – Bijay Ratna,    २०७८ आषाढ ४, शुक्रबार    वर्गीकृत समाज

किस्ट मेडिकल कलेजय् वासः याकाच्वनादीम्ह वाङमय शताब्दी पुरूष संस्कृतिविद् डा.सत्यमोहन जोशी थौं अस्पतालं डिस्चार्ज जुयाः थःगु छेँय् लिहांझाःगु दु ।

उसाँय् अवस्था भिनावयेधुंकाः सामान्य न्यासिवनेगु यानाहयेधुंकाः वयकःयात डिस्चार्ज यानागु कलेजया प्रिन्सिपल प्रा.डा. बालमानसिंह कार्कीं जानकारी बियादीगु दु ।

अस्पताल स्रोतया कथं डा.जोशीयात सासः ल्हायेगुलिइ समस्यालिसें छातीया संक्रमण, नुगःया चालय् गडबडी व रक्तचाप म्ह्वः जुइगु समस्या जूगु खः ।

डिस्चार्ज जुयाः छेँय् लिहांझाःम्ह शताब्दि पुरुष डा जोशीया हाकनं छवाः लिपा स्वास्थ्य अवस्थाया जानकारी कायेगु अस्पतालया छातीरोग विशेषज्ञ प्रा.डा. मिलेशजङ्ग सिजापतीं धयादिल ।

वर्तमान परिस्थितियात स्वयाः मेगु निवाःतक्क वयकःयात फोन यायेगु अथवा नापलायेगु मयाःसे आराम याकेबीत नं इनाप याःगु दु । नुगः व सासः ल्हायेत समस्या खनेदयेधुंकाः वंगु जेठ २६ गते डा. जोशीयात किस्ट मेडिकल कलेजय् भर्ना याःगु खः ।

शताब्दि पुरुष जोशी वंगु वैशाख ३० गते तिनि १०२ दँय् पलाः तयादीगु खः । डा.जोशी व वयकःया जहान राधादेवी जोशीं किस्ट मेडिकल कलेजया विद्यार्थीतय् अध्ययन व शोधया लागिं थःगु शरीर मरणोपरान्त दान यानादीधुंकूगु दु ।

Detail page ad