arin JS
Home page Ad

सर्वेन्द्रं धाल, जितः स्थानीय संस्कृति, परम्परा तसकं यः

Jheegu Sah – Jheegusah Reporter,    २०७९ मङ्सिर १, बिहिबार    वर्गीकृत राजनीति

आसन्न आम निर्वाचनय् नेकपा एमालेपाखें प्रतिनिधि सभा सदस्यया लागिं येँ क्षेत्र नम्बर ६ पाखें प्रत्यक्ष उम्मेदवार सर्वेन्द्र खनालं थःत स्थानीय संस्कृति, परम्परा तसकं यःगु धयादीगु दु ।

घरदैलो ज्याझ्वःया झ्वलय् थँबहिलिइ नापलाःम्ह पूर्व प्रहरी महानिरिक्षक खनालं न्हापा थः प्रहरी सेवाय् दुबलय् थीथी जात्रापर्वय् स्थानीय जनतालिसे समन्वय यासें सुरक्षा व्यवस्था ताःलाकेगु यानागु व जात्रायात व्यवस्थित रुपं क्वचायेकेत फक्व भूमिका म्हितेगु यानागु धयादिल ।

‘वंगु दिनय् जिं थनया जात्रापर्वय् सुरक्षा व्यवस्था ताःलाकेत थम्हं फक्व भूमिका म्हितागु खः । आः जनप्रतिनिधिया रुपं स्थानीय जनतालिसे जानाः देश व राष्ट्रया सेवा याये धकाः वयागु दु’ खनालं धयादिल ।

स्थानीय संस्कृतिपाखें थम्हं यक्व सयेकागु वयकलं धयादिल । सहकार्य, सामाजिक विधि, व्यवहारया शिक्षा नं थनया संस्कृतिं कयागु वयकःया धापू खः ।

खँल्हाबल्हाया झ्वलय् खनालं २०६५ सालया ईन्द्रजात्रा काण्ड लुमंकादिल । उगु इलय् तत्कालीन अर्थमन्त्री बाबुराम भट्टराईं ईन्द्रजात्राया लागिं बियावःगु बजेट क्वकयाब्यूगु खः । वयां लिपा आक्रोशित स्थानीय जन समुदाय जात्रा हे दिकाः आन्दोलनय् कुहांवःगु खः ।

उगु इलय् स्थिती नियन्त्रणय् कायेत खनालं म्हितूगु भूमिकायात यक्वसिनं प्रशंसा याःगु खः ।

‘व इलय् थःगु सदियौं पुलांगु परम्परा, संस्कृति ल्यंकेमाःगु माग तयाः स्थानीय जनसमुदाय आन्दोलनय् कुहांवःगु खः । आन्दोलनय् कुहांवःपिन्त दमनकारी मखु, समन्वयकारी भूमिका माःगु खः । जिं व हे कथं ज्या यानागु खः’ खनालं १५दँ न्ह्यःया ई लुमंकादिल ।

व इलय् छम्ह सुरक्षाकर्मीया रुपं थनया स्थानीय जात्रापर्वय् थीथी भूमिका म्हितागु व आः जन प्रतिनिधि जुयाः स्थानीय संस्कृति परम्पराया दीगो व्यवस्थापन व संरक्षणया लागिं भूमिका म्हिते धकाः वयागु खनालं धयादिल ।

दँयदसं बजेट फ्वनाच्वनेमाःगु, सुरक्षा व्यवस्थापन, ट्राफिक व्यवस्थापनया लागिं ब्वाँय् जुयाच्वनेमाःगु स्थिती न्हंकाः जात्रापर्वयात व्यवस्थित यायेगुपाखे थःगु भूमिका दइगु खनालं धयादिल ।

अथे हे, संस्कृतियात पर्यटनलिसे स्वानाः गुथि, संस्कृतिलिसे सम्वन्धित सरोकारवाला पुचःयात समृद्ध दयेकेगु योजना नं खनालं न्यंकादिल ।

Detail page ad