arin JS
Home page Ad

मध्यपुर थिमिइ शंखधर पार्क उलेज्या

Jheegu Sah – Birajkaji Rajopadhyaya,    २०७८ कार्तिक २९, सोमबार    वर्गीकृत समाज

ख्वप जिल्लाया मध्यपुर थिमिइ नगरय् शंखधर पार्कया उलेज्या जूगु दु ।

थिमिस्थित शंखधर चोकय् दयेकूगु पार्कया उलेज्या आइतबाः येँ महानगरया प्रमुख विद्यासुन्दर शाक्यं यानादिल ।

उपत्यका नगरपालिका फोरमया नायः तकं खःम्ह महानगर प्रमुख शाक्यं पार्क उलेज्या समारोहस नवासें स्वनिगःया १२ नगरपालिकायात सार्वजनिक जग्गा संरक्षण, हरियाली प्रवद्र्धन व पार्क दयेकेत आर्थिक ग्वहालि यानागु जानकारी बियादिल ।

‘येँ महानगरपालिकां आ. व. ०७७/०७८ या स्वीकृत नीति तथा कार्यक्रम कथं नगर–नगर साझेदारी न्ह्याकाच्वंगु दु, संघीय राजधानी जूगुलिं येँ महानगरं थः विकास व समृद्धिया लँय् न्ह्याःवनेबलय् अभिभावक जुयाः मेगु नगरयात नं नापं यंकेमाः’ शाक्यं धयादिल ।

येँ महानगरं नगर–नगर साझेदारी ज्याझ्वः अन्तर्गत उपलब्ध याकूगु आर्थिक ग्वहालिं उगु पार्क दयेकूगु खः । येँ महानगरं देय् दुनेया नगरतलिसे भगिनी सम्बन्ध स्थापना यायेगु झ्वलय् न्हापांगु चरणय् स्वनिगः पिने ७ प्रदेशय् प्रत्येकय् छगूया दरं सम्बन्ध स्थापना यानाच्वंगु दु ।

ज्याझ्वःयात सम्वोधन यासें मध्यपुर थिमि नथरपालिका प्रमुख मदनसुन्दर श्रेष्ठं येँ महानगरपालिकाया ग्वहालिं करीब १९ रोपनी क्षेत्रफलये लःया झ्वाला, यग्गानाच्वंगु क्यब, ल्वहंहिति, दबू, वाकिङ रोड दयेकागु जानकारी बियादिल ।

थुकी येँ महानगरपालिकाया २ करोड व मध्यपुर थिमिया ४ करोड यानाः मुक्कं ६ करोड तका खर्च जूगु प्रमुख श्रेष्ठं कनादिल ।

‘पार्क अझ नं दयेके सिमधःनि, अझं छुं लगानी यायेमाली तिनि’, प्रमुख श्रेष्ठं धयादिल, ‘महानगरं थप आर्थिक ग्वहालि बीगु खँय् जिमिगु अपेक्षा कायम दनि ।’ 

महानगर उपप्रमुख हरिप्रभा खड्गी श्रेष्ठं तजिलजि व सम्पदा संरक्षण अले प्रवद्र्धनय् येँ व मध्यपुर नापं न्ह्याःवनेगु धयादिल ।

‘येँ जिगु कर्म छेँ खः, ख्वप थःछेँ । जितः निगुलिं नगरया उत्तिकं हे समृद्धि स्वयेयः’ वयेकलं तनादिल, ‘येँ महानगरया विकासया लागिं मेयर व उपमेयर दथुइ छुं नं विवाद मदु, छुं विवाद दुसा जिमिसं आन्तरिक रुपं हे ज्यंकाः न्ह्याःवने ।’

थुगु थासय् न्हापा फोहर वांछ्वयेगु याइगु खः । गुगुं इलय् फोहरया द्वँय् न्हाय् थुनाः जुइमाःगु थाय् आः पार्क जूगु खः । 

Detail page ad