ayutahuti
Home page Ad

शंखपार्कय् खुला व्यायाम स्थल न्ह्यात

Jheegu Sah – Birajkaji Rajopadhyaya,    २०७८ बैशाख १३, सोमबार    वर्गीकृत समाज

येँ महानगरपालिका वडा ४ स्थित शंखपार्कय् खुल्ला शारीरिक व्यायाम यायेगु थाय् न्ह्याःगु दु ।

थौं महानगर प्रमुख विद्यासुन्दर शाक्यं शंखपार्कय् खुल्ला शारीरिक व्यायाम यायेगु थाय्या उलेज्या यानादिल ।

व्यायामस्थलया उलेज्या लिपा नवासें महानगर प्रमुख शाक्यं थुगु उपकरण छ्यलीपिं उपभोक्तां बीगु प्रतिक्रिया लिधंसाय् मेथाय् नं विस्तार यायेगु योजना दुगु धयादिल ।

‘जिमिसं सार्वजनिक जग्गा संरक्षण यानाः पार्क दयेकेगु व पार्कयात बहुउपयोगी दयेकेगु योजना कथं ज्या यानाच्वनागु दु, थुकिया उपभोक्तापाखें वइगु सुझावया लिधंसाय् मेगु पार्कय् नं सेवा विस्तार यानावनेगु योजना दु’ शाक्यं उद्घोष यानादिल ।

अतिक्रमित सार्वजनिक जग्गाया पहिचान यायेगु, अतिक्रमण चीकेगु व सार्वजनिक छ्यलाबुलाय् हयेगु ज्याय् यक्व प्रगति जूगु दावी यासें थुकियात अझ अप्वयेका वनेमामाःगुलिइ शाक्यं बः बियादिल ।

व झ्वलय् महानगरया उपप्रमुख हरिप्रभा खड्गी श्रेष्ठं पार्क संस्कार ल्यंकेफःसा सामाजिक व्यवस्थापनय् तःधंगु ग्वाहालि जुइगु धयादिल ।

‘व्यवस्थित पार्कं स्थानीयया शारीरिक व मानसिक स्वास्थ्ययात बांलाकी, थुगु उपकरणयात व हे कथं छ्यलेमाः’ उपप्रमुख खड्गीया धापू खः ।

पार्कय् जडान याःगु हलंज्वलं प्रयोग यासें ४ वडाया वडाध्यक्ष मोहनबहादुर विष्टं वडाया मेगु पार्कय् नं सामान जडान यायेगु बिचाः दुगु धयादिल ।

आः पार्कय् व्यायामया लागिं करीब ८ लाख तका ज्वलिंज्वःया सामान अले उपकरण जडान याःगु दु । थन एव्डोमिनल फिटनेस कम्बाइनेसन, एअर वाकर, डबल सर्फोर्ड, सिङ्गल रोइङ् मेसिन, डबल स्लिट्स मेसिन, लेग एक्स्टेक्सन एण्ड फिटनेस राइडर, स्डान्डिङ् एण्ड सिटिङ् ट्वीस्टर, पुस अप एण्ड डिपस्टेशन व लेग लिप्टर लिसेंया उपकरण तःगु दु ।

Detail page ad