arin JS
Home page Ad

यलय् नृसिंह जात्रा क्वचाल

Jheegu Sah – Biraj,    २०७८ भाद्र १२, शनिबार    वर्गीकृत तजिलजि

उपाकलं सायाः नामं नं म्हस्यूगु यलया ऐतिहासिक नृसिंह जात्रा क्वचाःगु दु ।

जात्राया झ्वलय् थुगुसी येँया मखं त्वालतय् च्वंम्ह पुरुषोत्तम सुवेदी राजोपाध्याय नृसिंह जुयाः यल देय् चाःहुलाद्यूगु खः ।

जात्राया पाः लाःम्ह मनूया जिलाजं अथवा भिन्चा अथवा पुरोहितयात नृसिंह दयेकाः यल देय् चाःहुकेगु परम्परा दु । यलया द्यः बाज्या राजोपाध्यायतयगु उपाकर्म गुठीया दुजःपिनि दथुइ ज्येष्ठता आधारय् जात्राया पाः बीगु याइ ।

थुगुसी यल गाःबहाःयाम्ह कोमलेशानन्द राजोपाध्याय ‘कोमल जुजु’ या छेँय् नं जात्रा न्ह्याकूगु खः । व हे कथं जात्राया पाः न्ह्याकादीम्ह जुजुया जिलाजं सुवेदीयात नृसिंह दयेकूगु खः ।

नृसिंह जुयादीम्ह सुवेदी येँया दिगु तलेजुया मू पुजारी तकं खः ।

अथे हे, नृसिंहया जवंखवं च्वनीपिं लक्ष्मी व सरस्वतीइ थुगुसी गाःबहाःया निरज राजोपाध्याय व पिम्बहाःयाम्ह निधेश राजोपाध्याय च्वनादीगु खः । नृसिंहया न्ह्यःने धुपाँय् ज्वनाः विन्ति यानाः अःखतं न्यासिवनीम्ह प्रल्हाद जुयाः मखंयाम्ह विभान राजोपाध्याय च्वनादीगु खः ।

जात्राया पाः लाःम्हेसिगु छेँय् न जात्रा पिकायेगु परम्परा कथं जात्राया पाः लाःम्ह जुजुया छेँ गाःबहालं जात्रा न्ह्याःगु खः । गाःबहालं पिहांवःम्ह नृसिंहलिसें लक्ष्मी, सरस्वती व प्रल्हादं यलया सायाः रुट चाःहिलाः गाःबहालय् जात्रा न्ह्याःगु हे छेँय थ्यंकाः क्वचाःगु खः ।

गाःबहालं पिहांवःगु जात्रा प्यंगःथां, पिम्बहाः, नकबही, क्वालखु, झटापोल, क्वन्ति, क्वबहाः, स्वथ, मंगः, हौगः, नुगः, ओकुबहाः, थैना, चक्रबही, तिच्छुँगल्ली, इखालखु, जेनबहालं पुन्चलिइ जुयाः गाःबहालय् थ्यंकाः जात्रा क्वचाःगु खः ।

महामारीया अवस्थाय् विधि जक पूवंकाः जात्रा न्ह्याकागु उपाकर्म गुठी व्यवस्थापन समितिया न्वकू संजय शर्मा धयादीगु दु ।

‘नृसिंहलिसें अप्सरागण नं पिकायेमाःगु खः, बाजं खलः, भजन मण्डली थज्याःगु छुं हे मतःसे जात्रा पूवंकागु खः, महामारी व ल्वय् आदिं मुक्ति चूलायेमा धइगु कामना याइगु जात्रा मदिकागु जक खः’ न्वकू शर्मां धयादिल ।

यलया द्यः ब्रम्हू राजोपाध्यायतयगु उपाकर्म गुठीं दँयदसं भाद्र कृष्ण पञ्चमीया दिनय् जात्रा न्ह्याकावःगु दु । थुगु जात्रा छुं नं पंगः मवयक सुथां लाक्क क्वचाःसा भुखाय्, खुसिबाः, चलःलिसेंया दैवी प्रकोप अले ल्वय् आदिं मुक्ति चूलाइगु जनविश्वास दु ।

उपाकलं सायाःबलय् पिकाइम्ह नृसिंहयात हिरण्यकश्यपु स्यायेधुंकाः तं क्वलायेधुंकूम्ह शान्त स्वरुपयाम्ह कथं काइ । कात्ति प्याखनय् पिहांवइम्ह नृसिंह धाःसा तं चायाच्वंम्ह उग्ररुपयाम्ह खः ।

उपाकर्मया ब्राम्हण समुदायया दकले तःधंगु कर्म कथं काइ । यलया द्यः ब्रम्हू समुदायया थुगु उपाकलं सायाः क्वचायेधुंकाः तिनि उपाकर्म पूवनीगु मान्यता दु ।

द्यः न्यासि हे वनाः जुइगु जात्रा सम्भवतः थ्व हे छगू जक जुइ । 

Detail page ad