arin JS
Home page Ad

विष्णुमायाया ‘जितः ख्वयेकाः’या म्यूजिक भिडियो सार्वजनिक

Jheegu Sah – Biraj,    २०७८ आषाढ ५, शनिबार    वर्गीकृत मनोरञ्जन

कोभिड महामारी नियन्त्रणय् कायेत निषेधाज्ञा न्ह्यानाच्वंगु अवस्थाय् मनोरन्जन ख्यलय् मेमेगु क्षेत्र ठप्प जुयाच्वंसां म्यूजिक भिडियो क्षेत्रया गतिं धाःसा दिपाः मकाः । न्हिं न्हिं हे धइथें युट्युबय् न्हून्हूगु म्येया लिरिकलया नापं अफिसियल म्यूजिक भिडियोत सार्वजनिक जुयाच्वंगु दु ।

थ्व हे झ्वलय् थौं नं नेपालभाषाया छपु न्हूगु म्यूजिक भिडियो सार्वजनिक जूगु दु । गायिका विष्णुमाया व्यन्जनकारया म्ये ‘जितः ख्वय्काः छ वने फइमखु’ या म्यूजिक भिडियो थौं सार्वजनिक जूगु खः ।

कलाकार, पत्रकारतय् उपस्थितीइ जुममार्फत जूगु भर्च्युअल ज्याझ्वलय् म्ये सार्वजनिक याःगु खः ।

ज्याझ्वलय् नवासें वरिष्ठ सिने पत्रकार लिसें नेपालभाषा म्यूजिक भिडियोया न्हापांम्ह निर्देशक विजयरत्न तुलाधरं लकडाउनय् नं नेपालभाषाया म्यूजिक भिडियो ख्यलं बांलाःगु गति कयाच्वंगुलिइ लसता प्वंकादिल ।

पत्रकार दर्शनवीर शाक्यं म्येया शैलीयात स्वयाः दर्शकया नं व हे कथंया ई अनुभुति बीमाःगु बिचाः तयादिल ।

पत्रकार बिराजकाजी राजोपाध्यायं म्यूजिक भिडियो वा संकिपा स्वइम्ह दर्शकं उकिया पात्रय् थःत मालेगु यात वा लुइकल धाःसा निर्देशक सफल जुइगु बिचाः तयादिल ।

गायिका व्यन्जनकारं म्योया संगीतकार मदुम्ह पद्मज्योती बज्राचार्यया ज्ञानमाला भजनलिसें आधुनिक म्ये ख्यलय् योगदानयाबारे चर्चा यानादिल ।

ज्याझ्वलय् कलाकार सुरज व्यन्जनकार, स्वतन्त्र संसार महर्जनं नं थःथःगु बिचाः तयादीगु खःसा म्यूजिक भिडियोया संगीत संयोजक जुगल डंगोल, मोडलत अनुप शाक्य, सुषमा बज्राचार्य, रोजिना सुवाल, क्यामेरा निर्देशक व भिज्युअल एडिटर अमर चित्रकार, निर्देशक सुरज नापितं थःथःगु अनुभव न्यंकादीगु खः ।

मदुम्ह मन्त बज्रं च्वयादीगु म्येया म्युजिक भिडियोया बाखं सत्य घटनाय् आधारित धयातःगु दु ।

Detail page ad