arin JS
Home page Ad

एकेडेमीं देछात मदयावंपिं न्याम्ह प्राज्ञपिन्त श्रद्धान्जली

Jheegu Sah – Jheegusah Reporter,    २०७८ बैशाख २८, मंगलबार    वर्गीकृत साहित्य

नेपालभाषा एकेडेमिया ग्वसालय् थ्व लाबला दुने मदयावंपिं न्याम्ह प्राज्ञयात श्रद्धान्जलि प्वंकुसें बिचाः हायेका ज्याझ्वः याःगु दु । सोमबार जुम एपपाखें भर्च्युअल रुपं बिचाः हायेका ज्याझ्वः याःगु खः ।

एकेडेमिया पुलांम्ह भाइस चान्सलर बाखं च्वमि लक्ष्मण राजवंशी, संस्थापक पुलांम्ह सदस्य सचिव इन्द्र माली, वरिष्ठ प्राज्ञ वैयाकरणविद् रमापति राज शर्मा, प्राज्ञ वरिष्ठ सरोद वादक मोहनसुन्दर श्रेष्ठ, प्राज्ञ गोल्डेन भ्वाइस अफ नेपाल प्रेमध्वज प्रधान लिसेंयात लुमंकाः बिचाः हायेका मुँज्या जूगु खः ।

ज्याझ्वलय् एकेडेमीया दांभरिं वरिष्ठ साहित्यकार डा. पुष्पराज राजकर्णिकारं मदयावंपिनिगु सुगतिया कामना यासे थःगु खँ तयादीगु खः ।

अथे हे, बाखं दबूया छम्ह संस्थापक साहित्यकार राजा शाक्यं मदुम्ह बाखं च्वमि व शिक्षासेवी लक्ष्मण राजवंशी दकले अप्वः ल्याखय् बाखं च्वयादीम्ह बाखं च्वमि खः धासें बाखं दबुया स्थापना थेंज्याःगु बांलाःगु ज्या यानादीम्ह साहित्यह्यःमि कथं वयकःयात लुमंकादिल ।

साहित्य इतिहासकार व एकेडेमीया प्राज्ञ दुजः प्रा. प्रेमशान्ति तुलाधरं मदुम्ह साहित्यसेवी राजवंशीया जीवनी छगू प्रेरणाया स्रोत जूगु खँ तयादिल ।

नेपाल साहित्य मन्दिरया नायः वरिष्ठ साहित्यकार तिलकप्रकाश कायस्थं मदुम्ह वैयाकरणविद् रमापति राज शर्मां नेपालभाषाया ख्यलय् भाषाविज्ञान सम्वन्धि तसकं दुग्यंगु कृति पिथनाः भाषा ख्यःयात तःमि यानादीगु खँ न्ह्यथनादिल ।

नेवाः हाइकु ख्यःया नायः सुरेश प्रधानं मदुम्ह इन्द्र मालियात नेपाःया हाइकु साहित्य ख्यलय् ज्वः मदुगु योगदान बिायवंम्ह साहित्यह्यमि खः कथं लुमंकादिल ।

एकेडेमीया प्राज्ञ दुजः सिने पत्रकार विजयरत्न असंबरें नेपाःया गोल्डेन भ्वाइस धयातःम्ह म्येहालामि संगीतकःमि प्रेमध्वज प्रधानयात नेपाःया संगीत ख्यलय् सुनां ल्वःमंके मफइम्ह संगीतज्ञ खः धासें मदुम्ह म्येहालामि प्रधानया गुण स्मरण यानादिल ।

अथे हे साहित्यकार लिसें सन्चारकःमि मीना बज्राचार्यं सरोद वादनय् ज्वःमदुगु योगदान दुम्ह मोहन सुन्दर श्रेष्ठया कलाया जः नेपाःया संगीत ख्यलय् सदां दयाच्वनीगु बिचाः तयादिल ।

Detail page ad