arin JS
Home page Ad

देययात निर्दलीयतापाखे यंकेगु स्वःगु डा. सैंजुया धापू

Jheegu Sah – Bikash,    २०७८ श्रावण २७, बुधबार    वर्गीकृत राजनीति

नेपाः राष्ट्रिय पार्टीया नायः डा. विजय सैंजुं देययात निर्दलीयतापाखे घ्वायेगु षडयन्त्र न्ह्याःगु दावी यानादीगु दु । निर्वाचन आयोगं नेपाः पार्टी लिसें ४१ राजनीतिक दल दर्ता खारेज याःगु विषयस नेपाः पार्टीया नायः डा. सैंजुं थथे धयादीगु खः ।

झीगु सःलिसे खँ ल्हासें.सैंजुं आयोगं छसिकथं थीथी त्वहः तयाः राजनीतिक दलत खारेज यानायंकाः देशय् निर्दलीय तानाशाही व्यवस्था हयेगु षडयन्त्र न्ह्याकूगु दाबी यानादिल ।

‘संविधान कथं दर्ता जूगु दलयात थुकथं निर्वाचन आयोगं खारेज याये पायछि जू ला ? देययात निर्दलीयताय् यंकेत थीथी त्वहलय् दल खारेज यायेत स्वःगु खनेदत, थुकिया शुरुवात पहिचानवादी दलतय् पाखें जूगु दु’ सैंजुया धापू खः ।

आयोगया दल खारेजीया निर्णय संविधानया धारा २६९ या उपधारा २, ३, ४, ५ अःखः जूगु सैंजुया धापू खः ।

संविधानया धारा २६९ या उगु उपधाराय् राजनीतिक दल सम्वन्धि व्यवस्था दु । व झ्वलय् संविधानया धारा २६९ या उपधारा ४ (ख) य् थथे च्वयातःगु दु, ‘राजनीतिक दलया विधानय् म्ह्व्तिं न्यादँय् छक्वः उगु दलया संघीय व प्रदेश तहया प्रत्येक पदाधिकारीया निर्वाचन जुइगु व्यवस्था यायेमाः ।’

व हे उपधाराय् न्ह्यःने च्वयातःगु दु, ‘तर विशेष परिस्थिती ब्वलनाः न्यादँ दुने पदाधिकारीया निर्वाचन जुइमफुसा खुला दुने अज्याःगु निर्वाचन यायेफइगु कथं राजनीतिक दलया विधानय् व्यवस्था यायेत पनी मखु ।’

निर्वाचन आयोगं धाःसा स्वदँतक्क लेखा परिक्षण प्रतिवेदन मब्यूगु धासें ४१ राजनीतिक दल खारेजीया निर्णय याःगु खः ।

थ्व हे दथुइ, १९ गते दल दर्ता खारेजीया निर्णय याःगु आयोगं १८ गते धाःसा थीथी दलतयत २० हजार जरिवाना पुलाः दल दर्ता नवीकरण यायेत पत्राचार याःगु तर थःपिन्त धाःसा दल खारेजीया छुं हे औपचारिक जानकारीतक्क नं मवःगु सैंजुं धयादिल ।

‘सुइतं धाःसा नवीकरण याः वा धकाः सुचं बीगु, जिमिगु दल खारेज यायेधुंकाः औपचारिक जानकारी बीगु आवश्यकता तकं महसूस मयायेगु, थ्व निर्वाचन आयोगया भेदभावपूर्ण व्यवहार मजूला र ?’ सैंजुं धयादिल ।

सम्वादं निकास पिहांमवःसा थःपिं न्यायया लागिं न्यायालय वनेगु घोषणा नं वयकलं यानादिल । खारेजीइ लाःगु मेगु दलतलिसे नं सहलह यासें कानूनी प्रक्रियाय् वनेगु वयकःया धापू खः ।

वंगु दिनय् थीथी हुनिं आयोगय् लेखा परिक्षण प्रतिवेदन बीमफूगु धाःसा वयकलं स्वीकार यानादिल ।

पार्टीया पदाधिकारी, दुजःपिं मेगु पार्टीइ वनाब्यूगु, कोभिड महामारीया अवस्था, थः हे विरामी जुयाः अस्पताल भर्ना जुइमाःगु, केन्द्रीय महासचिवया कायलिसें केन्द्रीय दुजः हे कोभिडया हुनिं मदुगु लिसेंया हुनिं प्रकृया पूवंकेमफूगु सैंजुं जानकारी बियादिल ।

आयोगं ४१ राजनीतिक दलया दर्ता खारेज यानागु सुचं पिथनाकथं सैंजुं आयोगया निर्णयया विरोध यासें प्रेश विज्ञप्ती जारी यानादीगु खःसा पार्टीं येँय् पत्रकार सम्मेलन तकं यायेधुंकूगु दु ।

Detail page ad