arin JS
Home page Ad

नेपाः पार्टीया दल दर्ता खारेज

Jheegu Sah – Bikash,    २०७८ श्रावण १९, मंगलबार    वर्गीकृत राजनीति

नेवाःतयगु पार्टी कथं नीस्वंगु नेपाः राष्ट्रिय पार्टीया दल दर्ता खारेज जूगु दु ।

निर्वाचन आयोगया थौं च्वंगु मुँज्यां लेखापरिक्षण प्रतिवेदन मब्यूगु दल दर्ता खारेज याःगु झ्वलय् नेपाः राष्ट्रिय पार्टीया दर्ता नं खारेज जूगु खः ।

आयोगया थौं च्वंगु मुँज्यां स्वदँतक्क लेखापरिक्षण प्रतिवेदन मब्यूगु ४१ राजनीतिक दलया दर्ता खारेज याःगु खः । व हे ४१ दललिसें नेपाः राष्ट्रिय पार्टीया दर्ता नं खारेज जूगु खः ।

कन्हय् श्रावण २० गतेनिसें लागू जुइगु कथं उगु दलतय् दर्ता खारेजया निर्णय आयोगं याःगु खः । खारेज जूगु दलतय् नां, झण्डा, चिं खारेज जूगु मितिं दच्छितक्क मेगु छुं नं दलं छ्यले दइमखु ।

थ्वयां न्ह्यः, आयोगय् १३६ दल दर्ता दुगुलिइ आः थुगु दलतय् खारेजी धुंकाः ९५ दलया जक दर्ता कायम जूवंगु दु ।

दल दर्ता खारेज याःगुलिसें आयोगं प्रत्येक राजनीतिक दलयात क्वःज्यूगु जरिवाना ५० हजार तका सरकारी बाँकी सरह असुल उपर यायेत कुमारी चोक अले केन्द्रीय तहसिल ज्याकू बबरमहलय् च्वयाछ्वयेगु नं निर्णय याःगु दु ।

जरिवाना रकम असुल उपर मजूतल्ले खारेज जूगु दलया केन्द्रीय पदाधिकारी अले दुजःपिं मेगु राजनीतिक दलया पदाधिकारी जुइ दइमखु ।

राजनीतिक दल सम्बन्धी ऐन, २०७३ कथं आयोगय् दर्ता दुगु राजनीतिक दलतयसं थःगु लेखा तयेमाःगु व आर्थिक दँ क्वचाःगु खुला दुने आयव्ययया लेखा परीक्षण इजाजत प्राप्त लेखा परीक्षकपाखें लेखा परीक्षण याकाः लच्छि दुने आयोगय् पेश यायेमाःगु व्यवस्था दु ।

लिसें आयोगं ई क्वचाःगु ४५ न्हु दुने अज्याःगु दलयात उकथं लेखा परीक्षण प्रतिवेदन पेश मयाःगुया कारण क्यनाः स्पष्टीकरण न्ह्यब्वयेत आदेश बी फइगु व दलं स्पष्टीकरण न्ह्यब्वयेमाः ।

लगातार स्वदँतक्क लेखा परीक्षण प्रतिवेदन आयोगय् मब्यूगु राजनीतिक दलयात आयोगं अज्याःगु ज्याखँ खुला दुने भिंकेत आदेश बीफइगु व उगु ई दुने ज्याखँ मभिंकूसा आयोगं तत्काल जुइगु छगू निर्वाचनय् ब्वति काये मदइगु कथं आदेश बी फइगु व्यवस्था दु ।

Detail page ad