arin JS
Home page Ad

सर्वोच्चं लगन पार्क दयेकेज्या पंगु मेयर शाक्यया धापू

Jheegu Sah – Birajkaji Rajopadhyaya,    २०७८ श्रावण १४, बिहिबार    वर्गीकृत समाज

येँ महानगरपालिका प्रमुख विद्यासुन्दर शाक्यं सर्वोच्च अदालतं पनताःगुलिं येँया लगं त्वालय् लगं पार्क दयेकेज्या द्युगु धयादीगु दु ।

येँय् जूगु छगू ज्याझ्वलय् नवासें लगंया लिसें स्वनिगःया स्थानीयवासीया सुविधालिसें ईतिहास ल्यंकातयेगु लागिं दयेकेत्यनागु पार्क छम्हेसिया उजुरीया हुनिं दयेके मफयाच्वंगु धयादिल ।

‘ईतिहास, स्थानीय संस्कृति नं ब्वयेगु नितिं स्थानीय हे जानाः दयेकेत्यंगु लगन पार्क दयेकेज्या थौं दिनाच्वंगु दु । छम्हेसिया उजुरीया भरय् ज्या दिकाः आः कोरोनाया कारण क्यनाः थ्व मुद्दायात पेशीइ हे मतःसे थाकातःगु दु’ शाक्यं धयादिल ।

ज्याझ्वलय् २१ वडास्थित तःबहाःया गनेद्यःलिसेंया द्यःपिं व तुंफःया उलेज्या जूगु खः ।  महानगर प्रमुख शाक्य व पूर्वमन्त्री कृष्णगोपाल श्रेष्ठं पुनर्निर्माण क्वचायेकाः पुनर्स्थापित द्यःपिं व तुफःया पूजा यासें मंकाः रुपं उलेज्या यानादिल ।

व झ्वलय् प्रमुख शाक्यं येँया संस्कृति, सम्पदात संरक्षण यायेगु नितिं छुं नं गुथि, खलःया थःगु हे जग्गा दुसा अन महानगरपालिकां सांस्कृतिक भवन दयेका बियाच्वनागु धयादिल ।

प्रदेश सरकारलिसेया सहकार्यं सम्पदा संरक्षणय् थप योगदान जुइगु अपेक्षा प्रमुख शाक्यं तयादिल ।

‘संस्कृति सम्पदा संरक्षणया ज्याय् येँ महानगरपालिकां न्ह्याकाच्वनागु ज्याय् बागमती प्रदेश सरकारं नं ग्वाहालि याःगु दु । येँय् सांस्कृतिक वाद्यवादन न्यायेत प्रदेश सरकारं ३ करोड तका फ्याःगु दु’ शाक्यं धयादिल ।

येँ महानगरपालिका २१ वडा ज्याकू व स्थानीय तःबहाः पुचःया मंकाः कुतलय् तुंफः व मूर्ति पुनस्र्थापना याःगु खः । थनया गनेद्यः लगमं दक्षिण भेगय् च्वनीपिं डंगोल, महर्जन, श्रेष्ठतय् बुसांनिसें मृत्युतक्कया संस्कारय् न्हापां पूजा यायेगु यानाच्वंगु दु ।

Detail page ad