arin JS
Home page Ad

मेयर शाक्यपाखें खोप केन्द्रया अनुगमन

Jheegu Sah – Birajkaji Rajopadhyaya,    २०७८ जेठ २५, मंगलबार    वर्गीकृत समाज

येँ महानगरपालिका प्रमुख विद्यासुन्दर शाक्यं ६० दँनिसें ६४ दँया नागरिकतयत कोभिडविरुद्धया खोप कायेत इनाप यानादीगु दु ।

थौंनिसें न्ह्याःगु ६० निसें ६४ दँया मनूतय् नितिं भेरोसिल खोप ज्याझ्वःया अनुगमनया झ्वलय् खोप केन्द्र थ्यंकादीम्ह महानगर प्रमुख शाक्यं थथे इनाप यानादीगु खः ।

‘थुगु दँ पुचःया सुं नं मनूत खोप अभियानय् त्वःमफीमा धकाः जनप्रतिनिधिया न्ह्यलुवाय् त्वाःत्वालय् माइकिङ यायेगु व्यवस्था यानागु दु, थ्व पालय् छगू लाख नागरिकयात खोप बीगु आज्जु कयागु दु’ शाक्यं धयादिल ।

शाक्यं थौं वडा १३ या जनप्रभात मावि कालिमाटी, वडा २१ या यंगाल सामुदायिक सहरी स्वास्थ्य क्लिनिक, वडा २३ या ओमबहाः व वडा २५ या कन्या मन्दिर माध्यामिक विद्यालयया खोप केन्द्रया अनुगमन यानादीगु खः ।

‘न्हापाया दिनय् थीथी अस्पतालयय् केन्द्र दयेकाः खोप अभियान न्ह्याकाबलय् भिडभाड जुइगु, भिडभाडं संक्रमण पुनीगु ग्याःचिकु अप्वःगु लिसेंया खँ वःगुलिं येँ महानगरपालिकां ३२ गुलिं वडाय् ३२ गू हे केन्द्र दयेकाः खोप अभियानयात व्यवस्थापन यानागु दु’ शाक्यया धापू खः ।

अनुगमनया झ्वलय् शाक्यं फक्व याकनं सकिसतं खोपया व्यवस्था यायेत सुझाव वःगु शाक्यं जानकारी बियादिल । सकसिगु सुझावयात आत्मसाथ यासें नेपाल सरकारलिसे समन्वय यानाः फक्व याकनं दक्व महानगरवासीयात खोपया व्यवस्था यायेगु प्रतिवद्धता शाक्यं प्वंकादिल ।

Detail page ad