arin JS
Home page Ad

महर्जन कम्प्लेक्सया दयेकेज्या लिपांगु चरणय्

Jheegu Sah – Biraj,    २०७८ मङ्सिर ५, आइतबार    वर्गीकृत अर्थ

येँया न्हूसतकस्थित महर्जन बिजनेस एसोसिएट्स (एमबिए) प्रालिं दयेकाच्वंगु बहुचर्चित व्यापारिक भवन महर्जन कम्प्लेक्सया दयेकेज्या लिपांगु चरणय् थ्यंगु दु ।

आः थुगु भवनया दयेकेगु ज्या ९९ प्रतिशत धइथें क्वचायाः छुं फिनिसिङया ज्या जक ल्यं दुगु धाःगु दु । एमबिएया नायः कृष्णलाल महर्जनं भवनया दयेकेज्याय्  छुं ल्यंपुल्यं ज्या जक ल्यं दनिगु व ओपनिङया लागिं तयार जूगु धयादिल ।

‘दयेकेज्याया शुरुवाती चरणय् लाःवःगु थीथी पंगःया लिसें निक्वः निक्वःया लकडाउनया हुनिं नं छुं लिबाःगु खः, आः भवन तयार जुइधुंकल, याकनं हे कम्प्लेक्स उलेज्या यायेत्यना’ महर्जनं धयादिल ।

कम्प्लेक्सय् लिफ्ट, क्याप्सुल लिफ्टलिसें एलिभेटर नं जडान यानातःगु दुसा स्वच्छ फय्या लागिं धकाः दथुइ खुल्ला थाय् नं त्वःतातःगु दु । बसन्तपुर दरवार स्क्वाएरलिसे स्वाःगु भवनं बसन्तपुरया साँस्कृतिक लूलिसें न्यूरोड, वंगःया चहलपहल नं स्वयेफइ ।

कम्प्लेक्सय् दुहांवइपिनिगु सुविधायात नं ध्यानय् तयाः भवनया सजावटय् आधुनिक व साँस्कृतिक, प्राकृतिक झलक बीत स्वयागु महर्जनया धापू खः ।

कम्प्लेक्सय् अप्वःथे थाय् बुक जुइधुंकूगु व छुं छुं जक ल्यं दनिगु वयकलं धयादिल । कम्प्लेक्सया भूमिगत तल्लाय् फुड कोर्ट व मेमेगु स्पेशय् नं लुँवहःया तिसापसः लिसें मेमेगु नं पसः आदिया लागिं थाय् बुक जुइधुंकूगु महर्जनं जानकारी बियादिल ।

तत्कालीन त्रिस्टल होटल भवन २०७२ सालय् एमबिए कम्पनीं न्यानाकयाः महर्जन कम्प्लेक्स भवनया दयेकेज्या न्ह्याकूगु खः । नेपाःया न्हापांगु नियो क्लासिकल दावी यानातःगु व्यापारिक भवनया स्वरूपयात युनेस्कों तकं बसन्तपुरया गद्दी वैठकलिसे ज्वःलाःगु धाःगु दु ।

Detail page ad