arin JS
Home page Ad

बुंगद्यः कोदुवालं यलय् बिज्याकल

Jheegu Sah – Bijay Ratna,    २०७८ बैशाख २९, बुधबार    वर्गीकृत तजिलजि

बुंगद्यःया रथ जात्राया झ्वलय् कोदुवालय् वनाः बुंगद्यः कयाहःगु दु । बुंगद्यः रथय् बिज्याके छन्हु न्ह्यः कोदुवालय् वनाः द्यः काःवनेगु परम्परा कथं म्हिगः मंगलबाः द्यः कांवंगु खःसा थौं द्यः यलय् हःगु खः ।

द्यः काः वनेगु झ्वलय् गुरुजु, द्यः पाः लाःम्ह पाञ्जु, मलीनी, सुवाः व छम्ह जेमा कुरुवालय् अमाई खुन्हू चा च्वनेगु याइ । पारुकुन्हू सुथ न्हापां कोदुवाःया खुसिइ च्वंगु जल कलशय् तयाः लः पाञ्जुं छग्वः व मलिनी नं छग्वः कलश थःगु गर्भय् अर्थात् प्वाथय् तयाः जनिखं हिनाः यलया तःबहालय् हयेगु याइ ।

उकथं कलश हयेगु झ्वलय् कोदुवाःनिसें गनं हे मदिकूसे न्यासि हे वयाः तःबहालय् थ्यंकेमाःगु चलन दु ।

थुगुसिइ मलिनी रेबिका मलि व लः पाञ्जु वनाः कलशय् जल कयाः हःगु खःसा गुरुजु मोति बज्राचार्य बिज्याःगु खः ।

तःबहालय् थ्यनेवं थकाली नकिम्हं कलश ज्वनावःपिं निम्हेसितं लसकुस यानाः दुकायेगु याइ ।

बुंगया देगः दुने दुहां वनाः कलशय् ज्वनावःगु नीलखं पाञ्जुं जवय् व मलिनीनं खवय् बज्रय् लः हाय्की । व धुंकाः तनि करुणामयया सुथसिया नित्यपुजा यानाः करुणामययात प्राण प्रतिस्था यानाः ज्वाला न्हाय्कं क्यनी ।

वहे खुन्हु स्वीनिकू जाःया रथय् बिज्याकेत बुंगद्यःयात खतय् तयाः पुच्वय् यंकी । बुंगद्यः रथय् तयाः अक्षयतृतीयाया कन्हय्कुन्हुंनिसें रथ पुच्वं साला जात्रा सुरु जुइ । थौं बुंगद्यः रथय् बिज्याकेगु ज्याझ्वः दु ।

यलया बुंगद्यःयात सहकाल, करुणा अले वर्षाया द्यः कथं हनावयाच्वंगु दु । नेपाःया दकले ताःहाकःगु रथजात्रा कथं कयातःगु बुंगद्यःया जात्रा बांलाक क्वचाःसा वा नं बांलाक वयाः बुँइ पिनातःगु बालीनाली बांलाक सइगु जनविश्वास दु ।

लिच्छवी जुजु नरेन्द्रदेवया पालय् नेपालमण्डलय् झिंनिदँ तक्क वा मवया बुँइ अन्न मसयाः अनिकालं मनूत म्वाये थाकुगु खँ बुंगद्यःया नेपाल आगमनलिसे स्वानाच्वंगु द ।

करुणामययात नेपालय् हयेफःसा वा वइगु भविष्यवाणी यायेधुंकाः येँ देय्या तान्त्रिक आचार्य बन्धुदत्त, यलया भलिया ललित ज्यापु व ख्वपया जुजु नरेन्द्रदेव स्वम्ह दक्षिण भारतया कामारुकामाक्षय् वनाः अनेक तान्त्रिक विधिकथं राक्षसतयगु थासं श्री करुणामय अर्थात बुंगद्यःयात नेपालमण्डल थ्यंके हःगु जनविश्वास दु ।

करुणामय बुंगद्यःयात बज्रयानी वौद्ध धर्मावलम्बीतयसं आर्यवोलोकितेश्वर, नाथ अनुयायीं मच्छिन्द्रनाथ, वैष्णवतयसं विरंची नारायण, शाक्ततयसं शक्ति व सूर्यया उपासकपिन्सं सुद्र्यः कथं हनावःगु दु । 

Detail page ad