arin JS
Home page Ad

डेनमार्कं वल सुदिपया ‘म हिँडे घर’

Jheegu Sah – Birajkaji Rajopadhyaya,    २०७८ कार्तिक २, मंगलबार    वर्गीकृत मनोरञ्जन

वंगु ९ दँ न्ह्यःनिसें डेनमार्कय् च्वनावःम्ह म्येहालामि सुदीप सायमया न्हूगु म्ये ‘म हिँडे घर’ पिदंगु दु ।

छेँ लुमंकाः विदेशय् च्वनेत वाध्य नेपाःमिपिनिगु बाखंयात कःघानाः दयेकातःगु म्ये ‘म हिँडे घर’ या म्यूजिक भिडियो मोहनिया लसता लाकाः म्येहालामि सुदीपया हे युट्युब च्यानलमार्फत सार्वजनिक जूगु खः ।

म्येय् थः व थः थुज्वःपिं मोहनि थुज्वःगु नखलय् तकं छेँ लुमंकाः लुमंकाः विदेशय् च्वनाः ज्या यायेत वाध्य नेपाःमिया भावनायात कःघायेत स्वयागु सुदीपं धयादिल ।

‘छगू इलय् विदेशय् च्वनाः छुं याये धइगु तःधंगु रहर, म्हगस दइ, विदेश थ्यनेधुंकाः धाःसा गबले छेँय् लिहांवनाः परिवारलिसे आनन्दं च्वने धइथें जुइ, तर, थःगु हे वाध्यतां यानाः थथे जुइमखु । थ्व हे बाध्यताया बाखं खः जिगु म्ये म हिँडे घर’ सुदीपया धापू खः ।

डेनमार्क, कोपनहेगनय् छायाङ्कन यानातःगु म्ये विदेशय् च्वनाः ज्या यायेबलयया परिस्थिती व अज्याःगु परिस्थितीं दिक्क जुयाः छेँय् लिहांवयेत स्वयाच्वंम्ह छम्ह ल्यायम्हया बाखं क्यनातःगु दु ।

भिडियोलय् सुवास महर्जनया मुख्य भूमिका दुसा जेस भट्टराई व सुशील घिमिरें नं अभिनय यानातःगु दु । छायाङ्कन व दृश्य सम्पादन रतिश तुलाधर व सुशील घिमिरें याःगु दुसा निर्देशन रतिश तुलाधर, सुशील घिमिरेया लिसें म्येहालामि सुदीप थम्हं हे नं याःगु दु ।

सुदीपं थम्हं हे कम्पोज यानादीगु म्येया शब्द नं मन्दी जोशीलिसें सुदीपं हे च्वःगु खः । म्येया दकले लिपा छपु मुक्तकं म्ये व भिडियोया भावनायात अझ प्रष्ट यायेत स्वःगु दु । जे. सागरं च्वःगु मुक्तक सः अच्यूत घिमिरें वाचन यानातःगु दु ।

Detail page ad