arin JS
Home page Ad

अधिकार कायेत मिस्त थः हे न्ह्यज्यायेमाःगु उपमेयर खड्गीया धापू

Jheegu Sah – Jheesah Reporter,    २०७८ बैशाख १३, सोमबार    वर्गीकृत समाज

येँ महानगरपालिकाया उपमेयर हरिप्रभा खड्गी श्रेष्ठं देशय् तःक्वः हे राजनैतीक ह्यूपाः वःसां समान अधिकारया नितिं मिसातय् राज्यलिसेया द्वन्द क्वमचाःनिगु धयादीगु दु ।

कोभिड–१९ सचेतनाया तातुनां मंगलादेवी स्मृति प्रतिष्ठानं ग्वसाः ग्वःगु छवाःया नेतृत्व विकास तालिमया समापन समारोहस उपमेयर खड्गी श्रेष्ठं तालिमया छवाःया इलय् खंगु ह्यूपालं थः लयतायागु धयादिल ।

मंगलादेवी सिँहयात लुमंकूसें न्ह्याःगु ज्याझ्वलय् प्रतिष्ठानया नायः गंगालक्ष्मी अवालं थजाःगु तालिम निरन्तर यानावनेगु खँ तयादिल ।

येँ महानगरपालिका सामाजिक विकास विभाग प्रमुख दिपक अधिकारीं मिसातय् क्षमता अभिबृद्धिइ महानगरपालिकां थीथी योजना व ज्याझ्वःत दयेकाच्वनागु जानकारी बियादिल ।

तालिम स्यनामि सुरजवीर बज्राचार्यं ब्वति कयादीपिनिगु सक्रियता व चान्हि मधाःसे यानादीगु मेहेनतं थः अतिकं प्रभावित जुयागु धयादिल ।

तालिमया कजि आनन्दरत्न बज्राचार्यं नेतृत्वय् वनेत लिचिलीपिं मिसातय् नितिं तालिमया ग्वसाः ग्वयागु कनादिल ।

येँ महानगरपालिकाया ग्वाहालिइ जन चिकित्सालय न्ह्योखाय् जूगु तालिमय् २९ म्हेसिनं ब्वति कयादीगु खः ।

Detail page ad