arin JS
Home page Ad

निर्दलीय प्रधानमन्त्रीया पक्षय् मदुगु मेयर शाक्यया धापू

Jheegu Sah – Birajkaji Rajopadhyaya,    २०७८ श्रावण ११, सोमबार    वर्गीकृत राजनीति

येँ महानगरपालिका प्रमुख विद्यासुन्दर शाक्यं वर्तमान इलय् देयया नेतृत्व निर्दलीय प्रधानमन्त्रीं यानाच्वंगु धयादीगु दु ।

येँ महानगरपालिका वडा–२१ या वडा ज्याकू भवन शिलान्यास ज्याझ्वलय् नवासें महानगर प्रमुख शाक्यं थःपिं ०४६ साल न्ह्यःया थज्याःगु दलया ह्वीप मलाइगु निर्दलीय प्रधानमन्त्रीया विपक्षय् दुगु धयाादिल ।

आः देशय् दलया प्रधानमन्त्री मखसें अदालतया परमादेशं वःम्ह निर्दलीय प्रधानमन्त्रीं देयया नेतृत्व यानाच्वंगु धयादिल ।

‘दलया ह्वीप मलाइम्ह प्रधानमन्त्री धइम्ह निर्दलीय प्रधानमन्त्री खः,’ शाक्यं धयादिल, ‘जिं संविधान निर्मातातयत न्ह्यसः तयाच्वना, छु संविधान च्वःबलय् निर्दलीय प्रधानमन्त्रीया परिकल्पना याःगु खःला ? कि संविधानया अपव्याख्या यानाः निर्दलीय प्रधानमन्त्री दयेकूगु खः ?’

म्हिगः गुगु व्यवस्थाया विरुद्धय् जनता सडकय् कुहांवल, आः देययात व हे व्यवस्थापाखे घ्वायेगु ज्या जुयाच्वंगु शाक्यं दावी यानादिल । दलीय प्रधानमन्त्री दयेकेगुया विकल्प मदुगु वयकःया धापू खः ।

व झ्वलय् शाक्यं पार्टी धयागु छखा छेँ खः धासें छेँया दुजःपिन्सं छेँया नीतियात लीमाःगुलिइ बः बियादिल ।

‘जि निर्वाचनय् सूर्य चिं कयाः निर्वाचित जुयावया, आः जिं सिमा चिन्हय् भोट तये धयाजुइ ज्यू ला ? जिगु नैतिकतां बी ला ?’ शाक्यं धयादिल ।

नेकपा एमालें निर्वाचित छुं सासंदतयसं संविधान ल्यंकेत शेरबहादुर देउवाया पक्षय् मतदान यानागु धायेगु हाँस्यास्पद जूगु शाक्यया धापू खः ।

Detail page ad