ayutahuti
Home page Ad

नेवाः न्ह्यलुवा लक्ष्मण राजवंशी मन्त

Jheegu Sah – Biraj,    २०७८ बैशाख ११, शनिबार    वर्गीकृत समाज

नेवाः न्ह्यलुवालिसें संविधान सभाया सभासद् लक्ष्मण राजवंशी थौं मन्त । येँया थापाथलीस्थित नर्भिक अस्पतालय् वासः यायेगु झ्वलय् वय्कः मदुगु खः ।

वंगु चैत्र ३० गते सोमबाः वय्कः छेँय् हे स्वाहानेय् दयाः घाःपाः जूगु खः । वयकःया स्वाहाने दयाः छ्यनय् घाः लानाः आन्तरिक रक्तश्राव जूगु धाःगु खः ।

घाःपाः जुइधुंकाः वयकःयात वासः यायेत नर्भिक अस्पताल भर्ना याःगु खः । अस्पताल भर्ना यायेधुंकाः वयकःयात भेन्टिलेटरय् तयाः वासः यानाच्वंगु खः ।

मदुम्ह राजवंशी निगूगु संविधान सभाय् नेपाः राष्ट्रिय पार्टीपाखें सभासद जुयादीगु खः । लिपा वयकः पार्टीपाखें निष्काशित जुइधुंकाः बौद्धिक जनतान्त्रिक परिषद् पार्टी गठन यानादीगु खः ।

सिद्धार्थ वनस्थली स्कूलया संस्थापक प्रिन्सिपल तकं खःम्ह वयकः नेवाः देय् दबूया छम्ह संस्थापक नं खः ।

वि.सं. १९९२ सालय् जन्म जूम्ह वयकलं शिक्षाशास्त्रय् स्नातक व राजनीतिशास्त्रय् स्नातकोत्तर तगिंतक्क अध्ययन यानादीगु दु ।

साहित्यय् विशेष कथं बाखं विधाय् मन क्वसाःम्ह वयकलं बाखं साहित्यया उत्थानया नितिं बाखं दबू संस्था नं नीस्वनादीगु दु ।

वि.सं. २००५ सालय् राजनीतिइ दुहांझाःम्ह वयकलं खुला भूमिगत जीवन, ८ महिना निर्वासन जीवन नं हनादीमाल सा पटक पटक यानाः निदं जेलय् बन्दी जुयाः च्वनादीगु दु ।

Detail page ad