arin JS
Home page Ad

शिवपुरीइ मेयर शाक्य व उपमेयर खडगी सम्मानित

Jheegu Sah – Birajkaji Rajopadhyaya,    २०७८ आश्विन २१, बिहिबार    वर्गीकृत समाज

महाराजगंजस्थित शिवपुरी माध्यामिक विद्यालयं येँ महानगरपालिकाया मेयर विद्यासुन्दर शाक्य व उपमेयर हरिप्रभा खड्गी श्रेष्ठयात हंगु दु ।

विद्यालयया ७३क्वःगु बार्षिकोत्सवया लसताय् याःगु समारोहलय् मेयर शाक्य व उपमेयर खड्गी लिसें कामपा वडा ३ या वडाध्यक्ष दीपक के.सी.यात नं विशेष सम्मान याःगु खः ।

शिक्षा, स्वास्थ्य, भाषा, संस्कृतिलिसें मुक्कं समग्र येँ महानगरया विकासय् ब्यूगु विशेष योगदानया कदर कथं वयकःपिन्त सम्मान याःगु खः । ज्याझ्वलय् पूर्वमन्त्री इश्वर पोखरेलं वयकःपिन्त हनापौलिसें सम्मान यानादिल ।

उगु हे समारोहस थीथी संस्था अले मनूत जानाः स्थापना यानातःगु अक्षयकोषं वःगु व्याजं विद्यालयया ६० विद्यार्थीतयत छात्रवृत्ति नं लःल्हाःगु खः ।

लिसें विद्यालयस १५ दँ सेवा अवधि थ्यंम्ह शिक्षक बोजबहादुर बुढाथोकी, बर्ष उत्कृष्ट शिक्षक कान्छा नुरु शेर्पायात नं सम्मान याःगु खः ।

ज्याझ्वलय् पूर्वमन्त्री पोखरेलं एक शिक्षक एक ल्यापटप कार्यक्रम अन्तर्गत विद्यालययात ४० ल्यापटप उपलब्ध याकेगु प्रतिबद्धता प्वंकादिल ।

व हे ज्याझ्वलय् सांसद विकास कोष अन्तर्गत पोखरेलमार्फत प्राप्त २५ लाख धेबां दयेकूगु शिवपुरी चमेना गृहया नं उलेज्या याःगु खः ।

ज्याझ्वलय् कामपा. शिक्षा विभाग प्रमुख राम प्रसाद सुवेदी, विद्यालय व्यवस्थापन समितिया नायः ई. गिरिधर मिश्र, विद्यालयया प्रधानाध्यापक दिवाकर दूरदर्शी पाण्डें सुसंस्कृत समाज दयेकेत शिक्षाया महत्वया बारे नवानादीगु खः ।

Detail page ad