arin JS
Home page Ad

मरुसतःया गजू थ्यंकःवल

Jheegu Sah – Birajkaji Rajopadhyaya,    २०७८ श्रावण १५, शुक्रबार    वर्गीकृत तजिलजि

७२ सालया तःभुखाचं पूवंक हे दुनाः पाताः जुयाः थौंकन्हय् पुनर्निर्माणया झ्वलय् दुगु मरुसतःया गजू मरुसतलय् दुकाःगु दु ।

मरुसतःया च्वय् पलिइ तइगु गजू विहीवाः लसुकस यानाः मरुसतलय् दुकाःगु खः । बाजंगाजं व गुर्जुया पल्टनलिसें नेपाली सेनाया जवानतयसं कुबियाहयाः गजू मरुसतलय् दुकाःगु खः ।

वयां न्ह्यः मरुसतः लिक्क हे दुगु श्रीखण्डतरुमुल महाविहार (सिँख्वःमू बहाः) दुने स्वन्हुतक्क गजूया गुप्त तान्त्रिक पूजा याःगु खः ।

मरुसतः दुने दिकेधुंकाः सिँख्वःमूबहाःया पण्डित प्रा. यज्ञमानपति वज्राचार्यया नेतृत्वय् व हे बहाःया गुर्जुपिन्सं चर्या नृत्यलिसें गजूया प्रतिस्थापन पूजा यानादीगु खः । साःया सिं दयेकातःगु गजुलिइ १३ चाः दु । थुकियात सिजःया पातां भुनाः स्थापना याइ ।

काष्ठमण्डप पुनर्निर्माण समितिया नायः अले बागमती प्रदेशया सांसद राजेश शाक्यं साउन महिना दुने हे मरुसतलय् गजू छुइ धुंकेगु धयादिल ।

‘गजुू हयेगु धइगु ज्या क्वचाइगु चरणय् थ्यन धइगु संकेत खः, गजू छुइधुंकाः मरुसतः पुनर्निर्माणया ज्या नं क्वचाइ’ शाक्यं धयादिल ।

मरुसतः अर्थात काष्ठमण्डपया हे नामं येँया नां नं काठमाडौं च्वंवंगु धयावःगु दु ।

७गूगु शताब्दीइ दयेकूगु थुगु सम्पदा पुनर्निर्माणया लागिं येँ महानगरपालिकाया आर्थिक लगानीइ पुनर्निर्माण समिति गठन यानाः ज्या न्ह्याकूगु खः ।

समितिं ०७५ या वैशाखनिसें पुनर्निर्माणया ज्या न्ह्याकूगु खः । पुनर्निर्माणया ज्या न्ह्याकेत महानगरपालिकां ५० लख तका ब्यूगु खः । व धुंकाः निगू किस्ताय् ५÷५ करोड तका ब्यूगु खःसा वंगु असारय् मेगु १ करोड तका ब्यूगु खः ।

आःतक्क मरुसतः पुननिर्माणया लागिं महानगरं ११ करोड ५० लाख तका बी धुंकूगु दु ।

गजू लसकुस ज्याझ्वलय् पुनर्निर्माण समितिया नायःलिसें वागमती प्रदेश सांसद शाक्य, प्रतिनिधि सभाया सांसद बीना श्रेष्ठ, बागमती प्रदेश सांसद डा. अजयक्रान्ति शाक्य, येँ महानगरपालिकाया उपप्रमुख हरिप्रभा खड्गी श्रेष्ठ, सम्पदा समितिया कजिलिसें १८ वडाया अध्यक्ष न्हुछेकाजी महर्जननापं पुनर्निर्माण समितिया पदाधिकारीतय् उपस्थिती दुगु खः ।

Detail page ad