arin JS
Home page Ad

कर्मा संकिपाया रिलिज डेट घोषणा

Jheegu Sah – Entertainment Bureau,    २०७८ फाल्गुण २, सोमबार    वर्गीकृत मनोरञ्जन

ताः इलंनिसें स्वकुमिपिन्सं पियाच्वंगु नेपालभाषाया नांजाःगु संकिपा कर्म रिलिज जुइगु जूगु दु । गुण फिल्म्सया ब्यानरय् दयेकूगु संकिपा वइगु फागुन १४ गते रिलिज जुइत्यंगु दु ।

संकिपाया निर्देशक रामकृष्ण खड्गीं थौं थःगु सामाजिक संजालया अंगलय् संकिपाया प्रमो सार्वजनिक यासें संकिपा रिलिजया मिति घोषणा यानादीगु खः ।

निर्देशक खड्गीं व हे पोस्टमार्फत वइगु फागुन १४ गतेनिसें गुण सिनेमा हलय् संकिपा प्रदर्शन जुइगु जानकारी बियादीगु खः ।

थ्वयां न्ह्यः, संकिपा रिलिजया लागिं वंगु माघ १ गतेया मिति क्वःज्यूगु खः । तर तत्कालीन इलय् कोभिड संक्रमण अप्वयाच्वंगु अवस्थायात ध्यानय् तयाः स्थगित याःगु खः ।

संकिपाय् नांजाःपिं कलाकार कर्मा शाक्य, आशिष्मा नकर्मी, मदनकृष्ण श्रेष्ठ, नारायणदेवी श्रेष्ठलिसें अन्नपूर्णेश्वरी श्रेष्ठ, कृष्णभक्त महर्जन, यमन श्रेष्ठ, लूनिभाः तुलाधरलिसेंया कलाकारं अभिनय यानादीगु दु ।

संकिपाया बाखं विमलो भन्तें कनाबिज्याःगु वौद्ध जातक बाखनय् आधारित जू ।

Detail page ad