arin JS
Home page Ad

ज्यापु समाजं तालीम भवन दयेकीगु

Jheegu Sah – Birajkaji Rajopadhyaya,    २०७८ फाल्गुण २४, मंगलबार    वर्गीकृत समाज

ज्यापु समाज यलं समाजय् सीप विकास व क्षमता अभिवृद्धिया आज्जु ज्वनाः निरन्तर तालीम ज्याझ्वः यानावनेत तालीम भवन दयेकीगु जूगु दु ।

यलया ज्यापु समुदायया कुसा संगठन ज्यापु समाजं सोमबाः ज्यापु प्रज्ञा भवन भोलध्वाखाय् पत्रकार सम्मेलन यानाः तालीम ज्याझ्वः यानावनेत लोक कल्याण भवन दयेकेत्यनागु जानकारी ब्यूगु खः ।

पत्रकार सम्मेलनय् न्ववासें समाजया वरिष्ठ न्वकू सन्तमान महर्जनं यल गःछेँत्वाःया चिरिमैं महर्जनं दान ब्यूगु यल महानगरपालिका ११ वडा सैंथुगणेशस्थित १२ आना जग्गाय् उगु भवन दयेकेगु धयादिल ।

वइगु बुधबाः सुथय् विधिवत् रुपं पूजा यासें यल महानगरपालिका प्रमुख चिरिबाबु महर्जनं उगु लोक कल्याण भवनया शिलान्यास यानादीगु ज्याझ्वः दु  ।

समाजया नायः तीर्थलाल महर्जनं सरोकारवाला संघसंस्थातलिसे समन्वय यासें अन्तर्राष्ट्रिय स्तरया नमूना तालीम उगु भवनं यानावनेगु धयादिल ।

‘सीप व क्षमताया विकास जूसा सुं नं बेरोजगार च्वनेमालीगु स्थिती दइमखु, गुकिं समाजया आर्थिक उन्नतीइ नं तिबः जुइ’ नायः महर्जनं धयादिल, ‘थ्व हे खँयात ध्यानय् तयाः जिमिसं निरन्तर सीपमूलक तालीमत यानावयागु दु, व आः थुगु भवनं अझ उच्चस्तरीय, गुणस्तरीय तालीमत यानावनेगु जुइ ।’

भवन दयेकेत यल महानगरपालिकां ६० लाख तका ग्वहालि जुइगु जूगु दु । प्यतँजाःया भवनय् तालीमलिसें आर्थिक सबलीकरणया लागिं गोष्ठी, सभा, सेमिनार आदि नं यानावनेगु ग्वसाः दुगु धाःगु दु ।

Detail page ad