arin JS
Home page Ad

‘संस्कृतियात अर्थतन्त्रलिसे स्वानाः जनतायात समृद्ध दयेके’

Jheegu Sah – Birajkaji Rajopadhyaya,    २०७९ कार्तिक २५, शुक्रबार    वर्गीकृत राजनीति

आसन्न आम निर्वाचनय् प्रतिनिधि सभा सदस्यया लागिं येँ क्षेत्र नम्बर ८ पाखें नेकपा (एस) या उम्मेदवार जीवनराम श्रेष्ठं स्थानीय संस्कृतियात अर्थतन्त्रलिसे स्वानाः स्थानीय जन समुदाययात समृद्ध दयेकेत भूमिका म्हितेगु धयादीगु दु ।

संस्कृति पर्यटन तथा नागरिक उड्डयनमन्त्री तकं खःम्ह उम्मेदवार श्रेष्ठं झीगु सःलिसे खँ ल्हासें स्थानीय मूर्त अमूर्त संस्कृति, सम्पदायात प्रवद्र्धन यासें आर्थिक समृद्धिपाखे न्ह्याःवने फइगु बिचाः तयादिल ।

‘थनया संस्कृति व सम्पदायात माःगु कथं व्यवस्थित यानाः पर्यटकतयत सालेफइ । पर्यटक अप्वइगु धइगु हे थनया स्थानीय वासिन्दायात ज्या दइगु खः । थुकिं स्थानीय जनतायात आर्थिक समृद्धिपाखे न्ह्याकायंकी’ श्रेष्ठं धयादिल ।

थःगु थ्वयां न्ह्यःया कार्यकालय् स्थानीय संस्कृति व अर्थतन्त्रयात नापनापं न्ह्याकायंकेगु परिकल्पना ज्वनाः हनुमानध्वाखानिसें स्वयम्भूतक्क सम्पदा मार्ग दयेकेगु, नागार्जुनमा होमस्टेया लकस दयेकेगुलिसेंया योजनायात न्ह्यःने यंकागु वयकलं लुमंके बियादिल ।

थज्याःगु योजनां स्थानीय जनतायात लाभान्वित याइगुलिसें स्थानीय संस्कृतिया संरक्षणय् तकं तिबः जुइगु श्रेष्ठया दावी खः ।

‘हनुमानध्वाखानिसें स्वयम्भूतक्क वर्ल्ड हेरिटेज टु वर्ल्ड हेरिटेज ट्रेल दयेकेगु योजनां गति कायेधुंकूगु अवस्था दु । थ्व योजनां मूर्त रुप काइबलय् थन पर्यटकत दुहांवइ, उमिगु नितिं गाइड माल । स्थानीय वासिन्दायात व कथंया तालीम बियाः झीसं जनशक्ति तयार यानाच्वनागु दु’ श्रेष्ठं धयादिल ।

अथे हे, नागार्जुनय् स्थानीय वासिन्दालाई होमस्टे सम्वन्धि तालीम बीधुनागु नं वयकलं जानकारी बियादिल ।

स्थानीय जनतायात हे सहभागी याकाः योजना न्ह्याकूसा थुकिं दीर्घकालीन लिच्वः बीगु श्रेष्ठया दाबी खः ।

‘थज्याःगु योजनाय् स्थानीय जनतायात हे सहभागी याकेफःसा छगू ला योजनाय् स्थानीय वासिन्दाया नं स्वामित्व महसूस जुइ, मेगु धइगु उपिं प्रत्यक्ष रुपं लाभान्वित जुइ । थुकिला रिजल्ट धइगु स्थानीय जनतायात नं लजगाः दइगु जुल, स्थानीय संस्कृतिया नं संरक्षण जुल’ श्रेष्ठं थःगु योजनां जः ह्वलादिल ।

म्हिगःया केपी ओली नेतृत्त्वया सरकारं याःगु गलत निर्णय व गलत नीतिया कारणं थौं देयया अर्थतन्त्रय् नकारात्मक लिच्वः लाःगु धासें श्रेष्ठं स्थानीय संस्कृति व सम्पदाया प्रवद्र्धनमार्फत हे देयया अर्थतन्त्रय् सुधार हयेफइगु दावी नं यानादिल ।

देशय् दुने रोजगार दइगुलिसें स्वरोजगार जुइगु, उद्यमी जुइगु लकस दयेकेत तकं थम्हं भूमिका म्हितेगु वयकलं धयादिल । खँल्हाबल्हाया झ्वलय् वयकलं न्हापा थम्हं यानागु प्रतिवद्धता अप्वःथे पूवंकागु व ल्यं दुगु ज्यात आः न्हूगु कार्यकालय् पूवंकेगु धयादिल ।

Detail page ad