arin JS
Home page Ad

प्रतिपक्षय् हे च्वनेगु जसपाया धापू

Jheegu Sah – Biraj,    २०७८ जेठ ४, मंगलबार    वर्गीकृत राजनीति

जनता समाजवादी पार्टी (जसपा) ब्वदलीगु चर्चा व अड्कलबाजी दक्व थासं जुयाच्वंबलय् पार्टीया नायःद्वय महन्थ ठाकुर व उपेन्द्र यादवं मंकाः विज्ञप्ती पिकयादीगु दु ।

नायःद्वयं मंकाः विज्ञप्ती जारी यासें राष्ट्रिय सहमति अथवा थःगु हे पार्टीया नेतृत्वय् सरकार दयेकेगु अवस्था जूसा सरकार गठन यायेत न्ह्याःवनेगु धाःगु दु ।

तत्काल पार्टी सरकारय् दुहां मवनेगु व प्रतिपक्षय् हे च्वनाः थःगु भूमिका निर्वाह यायेगु नायःद्वयं धाःगु दु । पार्टीइ ब्वलंगु समस्या पार्टी संगठन दुने हे सहलह यानाः पार्टी विधान अन्तर्गत च्वनाः हे समस्या ज्यंकेमाःगु नं विज्ञप्तीइ धयातःगु दु ।

पार्टीइ नेतृत्वपाखें हे गुट उपगुट दयेकेगु, पार्टी दुने गुटबन्दी यानाः अराजक ज्याखँ यानाः थःथःगु पक्ष दयेकाः सञ्चारमाध्यमय् ब्यूगु गैर राजनीतिक गैर जिम्मेवार अभिव्यक्तिप्रति ध्यानाकर्षण जूगु नं नायःद्वयं न्ह्यथनादीगु दु ।

‘थज्याःगु ज्याखँ पार्टी एकता, अनुशासन, आचार संहीता अले पार्टी कार्यपद्धतीया प्रतिकुल खः । थुगु कथंया ज्या, अभिव्यक्ति अले ज्याखँयात तुरन्त दिकेमाः’ विज्ञप्तीइ च्वयातःगु दु ।

Detail page ad