arin JS
Home page Ad

जसपां महन्थ ठाकुरयात स्पष्टिकरण न्यन

Jheegu Sah – Biraj,    २०७८ जेठ १२, बुधबार    वर्गीकृत राजनीति

जनता समाजवादी पार्टी जसपां पार्टी नायः महन्थ ठाकुरलिसेंया नेतातयत स्पष्टिकरण न्यंगु दु ।

पार्टीं नायः ठाकुरलिसें वरिष्ठ नेता राजेन्द्र महतो, केन्द्रीय कार्यकारिणी दुजःद्वय सर्वेन्द्रनाथ शुक्ल व लक्ष्मणलाल कर्णयात स्पष्टिकरण न्यंगु खः । केन्द्रीय ज्याकू प्रमुख प्रकाश अधिकारीं पौ च्वयाः वयकःपिन्त स्पष्टिकरण न्यनादीगु खः ।

तर प्यम्हं नेतातयसं पौ कायेत अस्वीकार याःगु सीदुगु दु ।

पार्टी नायः ठाकुरया नामय् च्वयातःगु पतिइ थीथी ९ विषयस स्पष्ट यायेत धयातःगु दुसा मेपिं स्वम्ह नेतातयत ५ विषयस स्पष्ट यायेत धाःगु दु ।

उगु पतिइ नेतातयत प्रधानमन्त्री ओलीया संसद विघटन यायेगु निर्णयस साथ ब्यूगु, पार्टीया बिस्कं हे ज्याकू न्ह्याकूगु, संसदीय दलया विधान मदयेकुनिगु अवस्थाय् संसदीय दलया नेता घोषणा यानाजूगु विषयस स्पष्ट यायेत धयातःगु दु ।

वंगु जेठ ८ गते येँय् च्वंगु पार्टीया केन्द्रीय कार्यकारिणी समितिया मुँज्यां प्यम्हं नेतायात स्पष्टिकरण न्यनेगु निर्णय याःगु खःसा थौं वयकःपिनिगु नामय् पौ छ्वयाः स्पष्टिकरण न्यंगु खः ।

बहुमत दुजःया उपस्थिती दुगु केन्द्रीय कार्यकारिणी समितिया मुँज्यां वयकःपिन्त स्पष्टिकरण न्यनेगु निर्णय याःगु जसपाया वरिष्ठ नेता राजेन्द्र श्रेष्ठं जानकारी बियादिल । मुँज्याय् केन्द्रीय कार्यकारिणी समितिया ५१ दुजःमध्ये ३१म्हेसिया उपस्थिती दुगु वयकःया धापू खः ।

वर्तमान राजनीतिक परिवेशय् जसपा निगू पुचलय् ब्वदलाच्वंगु दु । नायः उपेन्द्र यादव पक्ष प्रधानमन्त्री केपी शर्मा ओलीया विरोधय् दनाच्वंगु दुसा मेम्ह नायः महन्थ ठाकुर पक्षं धाःसा प्रधानमन्त्री ओलीया विरोधय् वने मफइगु धयाच्वंगु दु ।

थज्याःगु अवस्थाय् तत्कालीन राष्ट्रिय जनता पार्टी (राजपा) व समाजवादी पार्टी दथुइ एकता जुयाः दयेकूगु जसपा हाकनं ब्वदलीगु अनुमान जुयाच्वंगु दु । यादव पक्षं थःगु पक्षय् बहुमत दुजः दुगु दावी यानावःगु दु ।

Detail page ad