arin JS
Home page Ad

जसपाया जनसरोकार दस्ता घोषणा

Jheegu Sah – Biraj,    २०७८ चैत्र ४, शुक्रबार    वर्गीकृत राजनीति

संघीय मामिला तथा सामान्य प्रशासन मन्त्री राजेन्द्र प्रसाद श्रेष्ठं थःगु थायबाय् मदयकाः च्वनेमाःपिं स्वबासीतयत नं सरकारं हे जग्गा बीगु धयादीगु दु ।

येँय् जूगु छगू ज्याझ्वलय् न्ववासें मन्त्री लिसें जनता समाजवादी पार्टी (जसपा) नेपालया वरिष्ठ नेता श्रेक्ष् कारणवश थःगु थायबाय् मदयकाः च्वनेमाःपिं स्वबासीतयत नं जग्गा बीगु कथं भूमि आयोगया परिभाषा संशोधन यानागु जानकारी बियादिल ।

‘सडक विस्तारलिसें थीथी कारणं थनया स्ववासीत सुकुम्वासी जूगु अवस्था दु, सुकुम्वासीयात जग्गा उपलब्ध याकेगु धकाः यानातःगु भूमि आयोगया परिभाषा संशोधन यानाः थःगु थायबाय् मदयकाः च्वनेमाःपिं स्ववासीयात नं जग्गा उपलब्ध याकेगु कथं संशोधन जुइधुंकूगु दु’ मन्त्री श्रेष्ठं धयादिल ।

जनता समाजवादी पार्टी (जसपा) नेपाल नेवाः राष्ट्रिय समिति अन्तर्गतया जनसरोकार समन्वय समितिं याःगु ज्याझ्वलय् जनसरोकार दस्ता घोषणा याःगु खः । ज्याझ्वलय् मन्त्री श्रेष्ठं दस्ताया दुजःतयत दस्ताया ज्याकेट लःल्हानादीगु खः ।

दस्ता घोषणा धुंकाः न्ववासें समितिया कजि श्यामकृष्ण प्रजापतिं करीब दत्या न्ह्यः हे दस्ता दयेकेधुंकागु खःसां आः औपचारिक घोषणा जूगु धयादिल । दस्तां स्वनिगःया स्थानीय वासिन्दातलिसे प्रत्यक्ष सरोकार तइगु मुद्दा ज्वनाः न्ह्याःवनेगु कजि प्रजापतिं धयादिल ।

दस्तां न्हापांनिसें हे सडक विस्तार, फास्ट ट्र्याक, सुख्खा वन्दरगाह, आउटर रिङरोड, गुठी विधेयकलिसेंया मुद्दाय् संघर्षय् कुहांवयागु लुमंकुसें स्थानीय मुद्दाय् आः झन सशक्त रुपं न्ह्याःवनेगु प्रजापतिं धयादिल ।

‘स्थानीय वासिन्दां भोगे यानावःगु समस्याया समाधानया लागिं सरोकारवाला निकायलिसे समन्वय, संवादयात न्ह्यःने यंकेगु जुइ, माल धाःसा संघर्षय् कुहांवयेमाःसां जिपिं लिचिलेमखु’ प्रजापतिया धापू खः ।

ज्याझ्वलय् दस्ताया ५१ दुजःया नां घोषणा याःगु खःसा लिपा मेपिं ५० दुजः तनेगु धाःगु दु ।

Detail page ad