arin JS
Home page Ad

इतिहासविद् गोवर्धन शर्माया सफू पितब्वज्या जुल

Jheegu Sah – Rajeev Rajopadhyaya,    २०७९ आषाढ ४, शनिबार    वर्गीकृत साहित्य

नेपालभाषाया साहित्य क्षेत्रय् समालोचना विधां व्यापकता काय् मफूगुलिइ सरोकारवालातयसं चिन्ता प्वंकूगु दु ।

येँय् म्हिगः जूगु छगू ज्याझ्वःया वक्तातय्सं समालोचना विधाया विकासया नितिं समालोचकतयत प्रोत्साहित यायेमाःगुलि बः बियादिल ।

राजोपाध्याय समाजं ग्वसाः ग्वःगु ज्याझ्वःया वक्तातयसं समालोचनायात सुझावया रुपय् मकाःसे आलोचनाया रुपय् काइगु प्रवृत्तीया हुनिं थ्व विधाया विकास जुइमफूगु बिचाः प्वंकादीगु खः ।

ज्याझ्वलय् मदुम्ह इतिहासविद् सह प्राध्यापक गोवर्धन शर्माया समालोचना सफू ‘उपन्यासया चाकलय् गिरिजा’ या पितब्वज्याः याःगु खः ।

समालोचक पूर्णकाजी ताम्राकारयानापं नेवाः देय् दबूया नायः पवित्र बज्राचार्य, वरिष्ठ पत्रकार अले ईल्वहँ पब्लिकेशनया प्रवन्ध निर्देशक नरेशबीर शाक्यलिसें नं सफूया पितब्वज्या यानादीगु खः ।

पितब्वज्या जूगु सफुतिइ नेपालभाषा साहित्य क्षेत्रया महाकवि गिरिजा प्रसाद जोशीया उपन्यासया मदुम्ह इतिहासविद् सह प्राध्यापक शर्मां समालोचना यानादीगु खः ।

पितब्वज्या जूगु उगु सफूयाबारे न्वःवासें वरिष्ठ पत्रकार शाक्यं समालोचना विधाय् इतिहासविद् शर्माया खुबीयात प्रशंसा यानादिल ।

‘गिरिजायात साहित्य क्षेत्रय् पागल कवि धकाः धायेगु नं याः । थःगु मनय् वःगु खँ गथे खः अथे हे च्वसाया रुपय् हयेफुम्ह छम्ह स्वच्छन्दवादी नं धायेगु याः । वयकःया विचारया स्वतन्त्रतायात गोवर्धनं सरल ढंगं प्रस्तुत यानादीगु दु’ शाक्यं धयादिल ।

समालोचक ताम्राकारं साहित्य क्षेत्रय् गिरिजा प्रसाद जोशीया योगदानयात लुमंकुसें पितब्वज्या जूगु सफुतिं इतिहासविद् शर्मायाके दुगु समालोचकया खुबी ब्वःगु बिचाः प्वंकादिल ।

‘गोवर्धन शर्मां थुगु सफुतिइ गिरिजाप्रसाद जोशीया उपन्यास समीक्षा यायेगु झ्वलय् समालोचनाया नियमयात गाक्कं बिचाः याःगु खनेदु । गाेवर्धनयाके दुने धात्थेंयाम्ह समालाेचक दुगु सफुतिं प्रमाणित याःगु दु’ समालाेचक ताम्राकारं धयादिल ।

मदुम्ह गोवर्धन शर्माया काय् सुभाष शर्मां थः अबु मदुगु १४ बर्ष लिपा वयकःया सफू प्रकाशन जूगुलिइ लसता प्वंकादिल । नेवाः देय् दबूया नायः पवित्र बज्राचार्य, नेवाः जातिय महासंघया नायः मनोज नेवाः खड्गीलिसें नं राजोपाध्याय समाजं थःगु पहिचान स्थापित यायेगु नितिं भाषा व संस्कृतिया संरक्षणय्र विशेष ध्यान बीमाःगु खँय् बः बियादिल ।

थुगु हे ज्याझ्वलय् कोरोना महामारीया इलय् संक्रमितया उपचारय् खटेजूपिं राजोपाध्याय स्वास्थ्यकर्मीत व २०७६ र ७७ सालमा एस.ई.ई परिक्षा पास जूपिं राजाेपाध्याय विद्यार्थीतयत सम्मान नं याःगु खः ।

समाजं सफू पितब्वज्याया नापं सफू ब्वज्या नं याःगु खः । ब्वज्याय् वेद, तन्त्र, नेपालया धर्म, संस्कार, संस्कृतिया नापं ख्यःलिसे सम्वन्धित सफूत तःगु खः ।

Detail page ad