arin JS
Home page Ad

मदुगु झिंप्यदँ लिपा गोवर्धनया सफू पिदनीन

Jheegu Sah – Jheegusah Reporter,    २०७९ आषाढ २, बिहिबार    वर्गीकृत समाज

मदुम्ह इतिहासविद् सह प्राध्यापक गोवर्धन शर्माया समालोचना सफू ‘उपन्यासया चाकलय् गिरिजा’ पिदनीगु जूगु दु । मदुगु झिंप्यदँ लिपा वयाः इतिहासविद् शर्माया थुगु सफू पिदनेत्यंगु खः ।

महाकवि गिरिजा प्रसाद जोशीं च्वयादीगु थीथी उपन्यासया शर्मां यानादीगु समालोचना च्वसुया मुना सफू पिदनेत्यंगु खः ।

राजोपाध्याय द्यःब्रम्हूतय् कुसा संगठन राजोपाध्याय समाजं सफू पिथनेत्यंगु खः । समाजं कन्हय् असार ३ गते शुक्रबाः येँया खुसिबुँस्थित नेपाः ब्यांक्वेटय् छगू ज्याझ्वः यासें सफू विमोचन यायेत्यंगु खः ।

इतिहासविद् शर्मा वंगु २०६५ भाद्र १३ गते मदुगु खः । थःगु जीवनकालय् वयकलं च्वयादीगु समालोचनायात छथाय् मुंकाः सफूया रुपं पिथनेत्यनागु व थुगु सफुतिं इतिहासविद् शर्माया समालोचक प्रतिभा नं न्ह्यब्वयेत सफू पिथनेत्यनागु समाजया नायः संजय शर्मा राजोपाध्यायं धयादिल ।

‘गोवर्धन शर्मा छम्ह बहुआयामिक व्यक्तित्त्व खः, वयकःया हे जीवनकालय् थ्व सफू पिथनेखंगु सा तसकं बांलाइगु खः, आः लिबाक्क सां पिथनेखन’ नायः राजोपाध्यायं धयादिल ।

सफूया मू ३५०/– तका तयातःगु दुसा सफू विमोचन ज्याझ्वलय् ४० प्रतिशत छ्यापनय् सफू उपलब्ध याकेत्यनागु राजोपाध्यायं जानकारी बियादिल ।

थ्व हे सफू विमोचन ज्याझ्वःलिसें समाजं थीथी सफूया ब्वज्यालिसें ‘पुस्तक मेला’ नं यायेत्यंगु दु । शर्माया सफू विमोचन ज्याझ्वःलिसें न्हिछि धइथें सफू मेला जुइगु ग्वसाः खलकं धाःगु दु ।

मेलाय् धर्म, बेद, तन्त्र, संस्कार, संस्कृतिलिसें साहित्य व थीथी क्षेत्रलिसे सम्वन्धित सफू उपलब्ध जुइगु सफू मेला ज्याझ्वःया कजि सुजित राजोपाध्यायं धयादिल ।

Detail page ad