arin JS
Home page Ad

जनप्रतिनिधि व कर्मचारीतय् दथुइया कासा ज्वलिंज्वः

Jheegu Sah – Birajkaji Rajopadhyaya,    २०७८ मङ्सिर २७, सोमबार    वर्गीकृत कासा

येँ महानगरपालिकाया २७क्वःगु महानगर दिवसया झ्वलय् ग्वसाः ग्वःगु मेयर–११ व प्रमुख प्रशासकीय अधिकृत–११ मैत्री फुटवलय् निगुलिं टोली दथुइ ज्वलिंज्वः जूगु दु ।

महानगरपालिकाया प्रमुख विद्यासुन्दर शाक्यं नेतृत्व यानादीगु जनप्रतिनिधिया टीम व प्रमुख प्रशासकीय अधिकृत राजेश्वर ज्ञवालीं नेतृत्व यानादीगु कर्मचारीया टीम दथुइ जूगु कासा ३–३ गोलया ज्वलिंज्वलय् क्वचाःगु खः ।

दशरथ रंगशालाय् थौं क्वचाःगु कासाया सुरुइ कर्मचारीया टीमं सिमन केसीं न्हापांगु गोल यासें टिमयात न्ह्यःने यंकल ।

उकिया छुं ई लिपा जनप्रतिनिधिपाखेंया कासामिं डी एरिया दुने हे ह्यान्ड यायेधुंकाः चूलाःगु पेनाल्टीया सदुपयोग यासें कर्मचारीपाखें सुन्दर हमालं गोल यासें टिमयात २–० या अवस्थाय् हल ।

न्हापांगु हाफय् मैदानय् दुहांवःम्ह वडा ६ या नायः दीपेन्द्र लामां गोल यासें जनप्रतिनिधिया टिमयात २–१ य् हयाकथं हे वडा ३ या सदस्य प्रेम थापां जनप्रतिनिधिया लागिं निगूगु गोल यासें कासायात २–२ गोलया ज्वलिंज्वलय् हल ।

निगूगु हाफया सुरुवातय् हे कर्मचारीपाखें सिमन केसीं हाकनं मेगु १ गोल तन । कासाया अन्त्यपाखे जनप्रतिनिधिपाखें प्रेम थापां मेगु १ गोल यायेधुंकाः ३—३ गोलया ज्वलिंज्वलय् क्वचाःगु खः ।

कासा न्ह्याये न्ह्यः राष्ट्रिय खेलकुद परिषदया सदस्य सचिव टंकलाल घिसिङं महानगर प्रमुख शाक्ययात फुटबल लःल्हानादीगु खः । कासाया संयोजन सामाजिक विकास विभागं याःगु खः ।

Detail page ad