arin JS
Home page Ad

येँ महानगरया केन्द्रीय भवनया जग स्वन

Jheegu Sah – Birajkaji Rajopadhyaya,    २०७८ आश्विन २५, सोमबार    वर्गीकृत समाज

येँ महानगरपालिकाया केन्द्रीय भवनया जग स्वनेगु ज्या क्वचाःगु दु ।

महानगर प्रमुख विद्यासुन्दर शाक्य व उपप्रमुख हरिप्रभा खड्गी श्रेष्ठं थौंकन्हय् वातावरण विभाग दुगु टेकुइ महानगरपालिकाया केन्द्रीय भवन जग पूजा यासें जग स्वनादीगु खः ।

ज्याझ्वलय् नवासें प्रमुख शाक्यं हरिभवनय् केन्द्रीय ज्याकू दयेकेगु धयागुलिइ मुद्दामामिलाय् तक्यने माःबलय् अन ज्या यायेमखंगु धासें मुद्दाया फैसला जुइधुंकाः उगु भवन नं पुननिर्माण जुइगु धयादिल ।

शाक्यं मि स्यायेत मदयक मगाःगु दमकलया भवन दयेकेगु योजनाय् तकं मुद्दा फयेमाःगु म्हाइपूगु अनुभव न्यंकादिल ।

ज्याझ्वलय् संघीय सांसद कृष्णगोपाल श्रेष्ठं सरकारया पात्र ह्यूसां स्वीकृत कार्यक्रम नियमित न्ह्यानाच्वनेमाःगुलिइ बः बियादिल । महानगर उपप्रमुख हरिप्रभा खड्गी श्रेष्ठं लिबाक्क हे जूसां केन्द्रीय भवन शिलान्यास यायेखंगु धासें लसता प्वंकादिल ।

भवन भूमिगत तलालिसें ८ तजाःया ६ हजार ६८३ दशमलव ३३ वर्ग मिटर क्षेत्रफलया जुइ । ०८० साल असोज मसान्ततक्कय् भवन दयेके सिधयेकेगु लक्ष्य काःगु दु ।

भवन दयेकेगु ठेक्का समानान्तर निर्माण सेवा प्रालिं ६९ करोड ५८ लाख १९ हजार ३ सय ५९ तकाय् चूलाकूगु दु ।

सहरी योजना आयोगया न्वकू सरोज बस्नेतयाकथं भुखाय् प्रतिरोधी प्रविधिया प्रयोग, जःखः चकंगु थाय् व मौलिक वास्तु शैली भवनया मुख्य विशेषता खः । वाति लः मुनेगु व मुंगु लःया शुद्धिकरण प्रणालीलिसेंया रिचार्ज पिट डिजाइनय् दुथ्याकूगु दु ।

भवनया च्यागूगु तलाय् २सःम्ह क्षमताया छगू व सच्छिम्ह क्षमताया छगू यानाः निगू सभाकक्ष तकं दयेकेत्यंगु दु ।

Detail page ad