arin JS
Home page Ad

धुम्रवाराही पार्कया शिलान्यास क्वचाल

Jheegu Sah – Birajkaji Rajopadhyaya,    २०७८ कार्तिक ३०, मंगलबार    वर्गीकृत समाज

येँ महागनरपालिकाया प्रमुख विद्यासुन्दर शाक्यं महानगरं सार्वजनिक जग्गाय् सामुदायिक भवन दयेकेगु प्रचलन त्वःताः येँयात मानव बस्ती अनुकुृल शहर दयेकेत पार्क व हरियालीयात प्राथमिकता बियागु धयादीगु दु ।

येँ महानगरपालिका वडा नम्बर ४ शिवप्रिया मार्गय् धुम्रवाराही पार्कया शिलान्यास यासें महानगर प्रमुख शाक्यं दुनेया सहरी क्षेत्रय् खुल्ला थाय् मदयावयेधुंकाः पिनेया सहरी क्षेत्रय् थज्याःगु अवस्था वयेकेमबीत सजगता नालागु धयादिल ।

‘विविधतां जाःगु विशेषता दुगु राजधानी शहरय् झीसं स्थानीययात जक सेवा बियां मगाः, सहरय् वइपिं सकसिगु व्यवस्थापन झीगु जिम्मेवारी खः’, शाक्यं धयादिल, ‘थुकिया लागिं नीति, योजना व कार्यक्रमपाखें अपेक्षा पूवंकेगु कुतलय् दु ।’

उगु हे ज्याझ्वलय् प्रदेशसभा दुजः नारायण सिलवालं धुम्रवराही पार्क दयेकेत न्हापांगु चरणय् करीव १ करोड तका लागत अनुमानय् ज्या न्ह्यायेत्यंगु धासें थुकिया परियोजना प्रतिवेदन कथं करीव ३ करोड तका मालीगु जानकारी बियादिल ।

मेगु ज्याया लागिं महानगरं लिपा नियमित बजेट फ्यायेत सिलवालं इनाप यानादिल ।

वडाध्यक्ष मोहनबहादुर विष्टं थःगु भौगोलिक क्षेत्र दुने वडां संरक्षण याःगु करीव ७२ रोपनी पर्ती व सार्वजनिक जग्गाय् १४ पार्क दयेकेत्यनागु जानकारी बियादिल ।

वडाध्यक्ष विष्टं निगू तःधंगु पार्क निर्माण प्रक्रियाय् थ्यंगु, छुं दयेके सिधःगु व छुं निर्माणाधीन अवस्थाय् दुगु धयादिल ।

थुगु क्षेत्रय् करीव १२ रोपनी सार्वजनिक जग्गा दुगुलिइ उकियात ४ ब्लकय् ब्वथलाः पार्क दयेकाच्वंगु दु ।

न्हापांगु ब्लक प्रदेश सरकारया बजेटय् दयेकाच्वंगु दुसा निगूगु व स्वंगूगु ब्लकय् दयेकेज्या न्ह्याःगु दु । प्यंगूगु ब्लक महानगर व प्रतिनिधि सभा दुजःया बजेटय् दयेकेज्या लिपांगु चरणय् थ्यंगु दु ।

वमध्ये धुम्रवाराही पार्क शिलान्यास जूगु थासय् करीव ७ रोपनी क्षेत्रफलय् जग्गा दु ।

करबाहेक करीब ८९ लाख तका लागत अनुमान याःगु पार्क दयेकेत शारदा कन्स्ट्रसनं ५८ लाख २९ हजार ५७६ तकाय् कबोल याःगु दु । वइगु असार मसान्त दुने पार्क दयेके सिधयेकेगु आज्जु तःगु दु ।

Detail page ad