arin JS
Home page Ad

नाट्य प्रतिष्ठान समावेशी मजूगु नाट्यकर्मीतय् धापू

Jheegu Sah – Entertainment Bureau,    २०७८ बैशाख ९, बिहिबार    वर्गीकृत मनोरञ्जन

वरिष्ठ नाट्यकर्मी नारायणदेवी प्रधानं नेपाल संगीत तथा नाट्य प्रज्ञा प्रतिष्ठानं नृत्य व नाट्य कलाकारयात कःघायेमफूगु धयादीगु दु ।

यलय् जूगु छगू ज्याझ्वलय् नवासें वरिष्ठ कलाकार प्रधानं प्रतिष्ठान विधागत रुपं समावेशी जुइमफूगु धासें सम्वन्धित निकायया ध्यान सालादिल ।

नृत्य निर्देशक संघ नेपाल यल कचां ग्वसाः ग्वःगु विक्रम सम्वत २०७८ न्हूदँया भिंतुना कालबिल ज्याझ्वलय् संघया केन्द्रीय नायः भुवनदास श्रेष्ठं कलाकारिता क्षेत्रय् नृत्य विधायात उपेक्षा यायेगु यानाच्वंगु धासें नृत्य निर्देशकतय् मुद्दा स्थापित यायेत सकलें नृत्य निर्देशकत संघमार्फत संगठित जुइत नायः श्रेष्ठं आव्हान यानादिल ।

उगु हे ज्याझ्वलय् नेपाल सरकारपाखें २०७७ सालयालागिं सुप्रबल जनसेवा श्री तृतीय पदकं सम्मानित कचाया सल्लाहकार तकं खःम्ह वरिष्ठ कलाकार नारायण देवी प्रधानयात सम्मान नं याःगु खः ।

ज्याझ्वलय् केन्द्रीय न्वकू संजय शर्मा राजोपाध्याय, केन्द्रीय छ्यान्जे ज्ञान बहादुर महर्जन, केन्द्रीय प्रवक्ता अले दुजः ऋषिकेश श्रेष्ठ, सल्लाहकार मोहन ब्यन्जनकारया लिसें थीथी जिल्लाया पदाधिकारीं भिंतुनालिसें थःथःगु नुगः खँ तयादीगु खः ।

उगु हे ज्याझ्वलय् वि.सं. २०७८ या क्यालेन्डर नं सार्वजनिक याःगु खः ।

Detail page ad