arin JS
Home page Ad

रियल बेटिसयात बुकाः बिल्बाओ सेमिफाइनलय्

Jheegu Sah – स्पाेर्ट्स ब्यूराे,    २०७७ माघ २३, शुक्रबार    वर्गीकृत कासा

कोपा डेल रेया दक्कले लिपांगु क्वाटरफाइनल कासाय् रियल बेटिसयात बुकुसें एथलेटिको बिलबाओ सेमिफाइनलय् दुहांवंगु दु । एथलेटिको बिल्बाओं बेटिसयात वयागु हे ख्यः बेनिटो भिल्लामरिनय् पेनाल्टी सुटआउटय् ४–१ गोलं बुकाब्यूगु खः ।

कासाया क्वःछिनातःगु ईलिसें अतिरिक्त इलय् तकं १–१ गोलया ज्वलिंज्वः जुइधुंकाः पेनाल्टी सुटआउटपाखें त्याकामि क्वःज्यूगु खः ।

बिल्वाओयात त्याकाबीत राउल गार्सिया, इनाकी विलियम्स, जोन मोर्सिलो व युरी बर्चिचें गोल यात । रियल बेटिसया नितिं एइसा मान्डीं जक गोल यायेफत सा सर्जियो केनालेस व जुआन्मीया गोल यायेगु कुतः ताःमलात ।

वयां न्ह्यः ९० मिनेटया कासा दुने ८४ मिनेटय् जुआन्मीं गोल यासें बेटिसयात अग्रता ब्यूगु खःसा इन्जुरी ईया प्यंगूगु मिनेटय् राउल गार्सियां गोल यासें कासायात ज्वलिंज्वलय् हयाब्यूगु खः ।

थ्वलिसें कोपा डेल रेया सेमिफाइनल समीकरण नं पूवंगु दु । थ्वयां न्ह्यः थःथःगु कासा त्याकाः सेभिया, लेभान्टे व बार्सिलोना सेमिफाइनलय् थ्यनेधुंकूगु दु । 

Detail page ad