arin JS
Home page Ad

फोहोरया दिगो व्यवस्थापन सम्वन्धि परियोजनाय् सम्झौता

Jheegu Sah – Birajkaji Rajopadhyaya,    २०७८ जेठ २६, बुधबार    वर्गीकृत समाज

येँया अनौपचारिक सफाईकःमि व सहरी समुदायया स्वास्थ्यय् पहुँच थकायेत वडा १९ या सहरी स्वास्थ्य केन्द्रयात सहरी स्वास्थ्य प्रवर्ध्दन केन्द्रया रुपं स्तरोन्नति यायेत सम्झौता जूगु दु ।

थौं येँ महानगर प्रमुख विद्यासुन्दर शाक्यया रोहवरय् येँ महानगरपालिका व फ्रान्सया मेड्सा डु मोन्ड दथुइ थुगु सम्झौता जूगु खः । सम्झौताय् महानगरपाखें वडा १९ या वडाध्यक्ष शशीलाल श्रेष्ठ व मेड्सापाखें नेपाल प्रतिनिधि डा. गियोम फेबोलं ल्हाःचिं तयादिल ।

सम्झौता धुंकाः नवासें महानगर प्रमुख शाक्यं  परियोजनां लक्षित पुचलय् ज्याझ्वः थ्यंकेत अःपुइगु प्रतिक्रिया बियादिल ।

‘स्वास्थ्य सेवाय् सकसिगु समान पहुँच विस्तार यायेत जिमिसं लगानी थकयागु दु । पूर्वाधार सुधार, उपकरण खरिद व जनशक्तिया समुचित परिचालनं जिमिसं आज्जुइ थ्यंके’ शाक्यं धयादिल ।

प्रमुख शाक्यं आः कोभिड महामारी व्यवस्थापनय् महानगरं यानाच्वंगु ज्याया बारे चर्चा यासें सकसितं कोभिड विरुद्धया खोप बीत सरकारलिसे जानाः ज्या यानाच्वनागुलिं हथाय् मचायेत इनाप यानादिल ।

न्हापां खोपय् च्यूताः मतःगु व आः चाप अप्वःगु अनुभव न्यंकुसें वयकलं गलत सुचंया शिकार मजुइत इनाप यानादिल ।

परियोजना शुरुवातया विषयस खँ ल्हासें डा. फेबोलं प्रयोगशाला स्थापना, जनशक्तिलिसें चिकित्सकीय सामग्री अले उपकरण तनेगु योजना न्यंकादिल ।

सम्झौता कथं येँ महानगरपालिकां १ करोड ५ लाख ४० हजार तका ब्यहोरे याइ । परियोजना न्ह्याकेत समन्वय समिति अले रणनीतिक व व्यवस्थापन समिति नीस्वनी ।

सम्झौता कथंया स्वास्थ्य प्रवर्ध्दन केन्द्र वडा १९ य् स्थापना जूसां मेगु वडा व नुवाकोटको ल्याण्डफिल साइट क्षेत्रय् दुगु स्वास्थ्य चौकीं तकं सेवा बीगु धाःगु दु ।

Detail page ad