arin JS
Home page Ad

‘नेवाःतय् भविष्य’ या विषयस जातीय महासंघया च्यूताः

Jheegu Sah – Jheegusah Reporter,    २०७८ पौष १४, बुधबार    वर्गीकृत समाज

संघीय मामिला तथा सामान्य प्रशासन मन्त्री राजेन्द्र प्रसाद श्रेष्ठं न्हापाया दिनय् तःमि व विकसित जातिया रुपं नेवाः समुदायया अवस्था आः धाःसा संकटय् लानावःगु बिचाः तयादीगु दु ।

मंगलबाः येँय् नेवाः जातिय महासंघं ग्वसाः ग्वःगु ‘नेवाःया भविष्य’ विषयक विचार गोष्ठीइ नवासें मन्त्री श्रेष्ठं गोरखा राज्य विस्तार धुंकाः न्ह्याःगु नेवारयात भाषिक, आर्थिक, सामाजिक व राजनीतिक दमन थौंया दिंतक्क छुं न छुं रुपं निरन्तर जुयाच्वंगु श्रेष्ठया धापू खः ।

‘वंगु दिनय् विदेशय् देगः, विहार, मूर्ति आदि दयेकेमाःसा नेपालं कलाकार सःतेगु याइगु खः व अज्याःपिं अप्वः धइथें कलाकारत नेवाः समुदाययापिं हे जुयाच्वनीगु खः । तर, थौं नेपालय् छुं दयेकेमाःसा भारतं ज्यामि झिके यायेमाःगु अवस्था वल’ श्रेष्ठं धयादिल ।

आःया संघीय शासनय् दक्वं जाती, दक्वं समुदायं मंकाः शासन न्ह्याकेफइगु अवस्थाय् ह्वःताःया सदुपयोग यासें न्ह्याःवनेत श्रेष्ठं छ्याता बियादिल ।

‘आः देशय् संघीय शासनय् हरेक जातिया पहिचान स्थापित जुइगु ह्वःताः दु । थीथी स्वायत्त क्षेत्र, संरक्षित क्षेत्रया रुपं मंकाः शासन यायेफइगु ह्वःताः सदुपयोग यासें आः उत्पीडित समुदाय नं न्ह्याःने वनेफइगु ई दु’ मन्त्री श्रेष्ठं धयादिल ।

अथे हे, येँ महानगरपालिकाया मेयर विद्यासुन्दर शाक्यं ह्वःताः वःगु इलय् थवंथवय् दोषारोपण, विरोध यानाः च्वनेगु स्वयां ह्वःताःया सदुपयोग यायेत इनाप यानादिल ।

न्हूपुखू, कमलपोखरीलिसेंया सम्पदा पुनर्निर्माणया प्रसङ्ग ल्ह्वनाः मेयर शाक्यं छुं नं ऐतिहासिक सम्पदाया पुनर्निर्माण, जिर्णोद्धार यायेत स्वयाबलय् पूर्वाग्रह तयाः विरोध यायेगु याःगु दावी यानादिल ।

‘छुं नं सम्पदाया पुनर्निर्माण, जिर्णोद्धार यायेत स्वयाबलय् छुं नं जानकारी, अध्ययन मदय्कं विरोध यानाः पनेगु याइ । थुकिं नोकसानी सुइत याइ ? झी विरोध यानाः च्वनेगु स्वयां आः येँया विकासय् जायेनु ले’ शाक्यं धयादिल ।

रत्नपार्कय् गणेशमान सिंहया शालिक तःगु हे पुचलं शंखधरया शालिक तयाबलय् विरोध याःगु धासें शाक्यं राजनीतिक पूर्वाग्रहं थहांवयाः समुदायया स्वार्थय् न्ह्यज्यायेत इनाप यानादिल ।

अथे हे, नेवाः आन्दोलनया न्ह्यलुवा डा. महेशमान श्रेष्ठं कथित विकासया नामय् स्वनिगलय् नेवाः समुदाययात विस्थापित यायेगु ज्या जुयाच्वंगु धयादिल ।

मेगा सिटी, स्मार्ट सिटीया नामय् नेवाःयात अल्पमतय् लाकेगु व हरेक क्षेत्रं नेवाःयात विस्थापित यायेत स्वयाच्वंगु श्रेष्ठया दावी खः ।

‘आः मेगा सिटीया नामय् स्वनिगःया जनसंख्या छगू करोड थ्यंकी । छगू करोडय् नेवाःया संख्या ७ प्रतिशत जुइ व अल्पमतयात बहुमतं शासन यायेत स्वइ’ श्रेष्ठया धापू खः । आदिवासी अधिकारबारे सचेत जुइत श्रेष्ठं नेवाः समुदाययात इनाप यानादिल ।

ज्याझ्वलय् जातिय महासंघया नायः मनोज नेवाः खड्गीं ‘नेवाःया भविष्य’ विषयस महासंघया अवधारणा न्ह्यब्वयादीगु खः । ५ पृष्ठया उगु अवधारणा पत्रय् राज्यं नेवाः समुदायया भाषा व संस्कृति धुंकाः आः भूमि नं लाकाकायेत स्वःगु दावी यानादीगु दु ।

थःगु भाय्, संस्कृति व भूमिया संरक्षण यासें राजनैतीक रुपं नं सचेत जुयाः नेतृत्व कयाः न्ह्याःवनेत नायः खड्गीं इनाप यानादिल ।

गोष्ठीं समुदायस विद्यमान समस्यायात म्हसीकाः वइगु दिनय् नं समुदाय दथुइ सहलह, अन्तरक्रिया यासें समस्याया समाधानय् जायेगु जानकारी खड्गीं बियादिल ।

‘झीसं समस्याया जक खँ ल्हायेगु मखु । थ्व गोष्ठी शुरुवाती पलाः खः, झीसं थुकथं हे सहलह याानावने व वइगु दिनय् समस्याया समाधानपाखे जाये’ खड्गीं धयादिल ।

महासंघया न्वकू न्हुछेँकाजी महर्जनं ह्वःताःया सदुपयोगय् नेवाः समुदाय यक्व थासय् छखे लाःगु बिचाः तयादिल । मेपिनिगु खँय् जुयाः विरोध याइगु प्रवृत्ती यक्व दे दुगु धासें न्वकू महर्जनं ह्वःताः स्वयेत नं इनाप यानादिल ।

ज्याझ्वःया ब्वतिमिपिन्सं दक्वं राजनीतिक पार्टीया नेवाः नेता, कार्यकर्तातय्सं मोर्चावन्दी हे यानाः समुदायया विकास व हितय् जायेमाःगु छ्याता ब्यूगु खः ।

Detail page ad