arin JS
Home page Ad

पुलुकिसि छेँया विरोध थम्हं गबलें मयानागु चन्द्रया धापू

Jheegu Sah – Jheegusah Reporter,    २०७९ बैशाख २६, सोमबार    वर्गीकृत राजनीति

स्थानीय निर्वाचन २०७९ या झ्वलय् येँ महानगरपालिका वडा १८ य् वडाध्यक्ष पदका प्रत्याशी चन्द्र महर्जनं थम्हं गबलें नं पुलुकिसि छेँया विरोध मयानागु धयादीगु दु ।

ऐतिहासिक व सांस्कृतिक महत्वया पुलुकिसि छेँयात परम्परागत शैली व सामग्री हे छ्यलाः दयेके जक धयागुलिइ उकियात गलत ढङ्गं थुइकूगु वय्कलं दावी यानादिल । येँय् येँ मपा १८ वडाय् गठबन्धन दलया उम्मेदवार व पत्रकारतय् दथुइ खँल्हाबल्हा ज्याझ्वलय् न्ववासें वय्कलं थथे धयादीगु खः ।

‘जिं ला सम्पदाया मापदण्ड दुने च्वनाः ज्या याय्, भूमिगत तल्ला मदय्के जकं धयागु खः, पुलुकिसि छेँ दय्के हे दइमखु ला गथे धाय्फइ जिं ? जिं धयागु छता खः, थुइकूगु धाःसा मेता हे जुयाबिल’ महर्जनं प्रष्ट यानादिल ।

पुलुकिसि छेँया खँय् थःगु उद्देश्य धइगु अमूर्त सम्पदा अन्तर्गत पुलुकिसियात विश्व सम्पदा धलखय् दुथ्याकेगु खःगु व उकिया हे लागिं मापदण्डयात ध्यानय् तयाः ज्या याय् धइगु खःगु वय्कःया धापू खः ।

‘मजिपातय् लाखय् छेँ स्वयादिसँ, परम्पराग शैलीइ परम्परागत सामग्री हे छ्यलाः दय्कूगु गुलि बांलाः खनेदु । गथे लाखय्या महत्व दु, व हे कथं पुलुकिसिया नं दु, पुलुकिसि छेँ नं उकथं दयेके धइगु जिगु धापू खः’ महर्जनं खँ प्रष्ट याय्गु झ्वलय् धयादिल ।

थः व थःगु पुचः येँ मपा १८ वडाय् निर्वाचित जुयावल धाःसा वडा दुनेया मूर्त अमूर्त सांस्कृतिक सम्पदाया संरक्षण व प्रवद्र्धनया लागिं गुरुयोजना हे दयेकाः ज्या यायेगु व नमूना सांस्कृतिक वडाया रुपं विकास याय्गु प्रतिवद्धता महर्जनं प्वंकादिल ।

१८ वडा दुनेया दीप्याखं, पुलुकिसि, न्यतमदु अजिमाया प्याखं, नानीचायाःलिसेंया अमूर्त सम्पदानिसें थीथी मठमन्दिरलिसेंया मूर्त सम्पदाया संरक्षण व प्रवद्र्धनया लागिं थःपिं जायेगु महर्जनया धापू खः ।

थःगु योजना न्यंकेगु झ्वलय् वय्कलं १८ वडायात येँ महानगरया सम्पदा मार्गलिसे स्वानाः वडायात पर्यटकिय हबया रुपय् विकास याय्गु व वडाबासीया आर्थिक स्तर थकायेगु घोषणा नं वय्कलं यानादिल ।

येँ मपा १८ वडाय् जनता समाजवादी पार्टी (जसपा) नेपाल, नेकपा माओवादी (केन्द्र) व नेकपा (एकिकृत समाजवादी) यानाः स्वंगू दलीय गठबन्धनं उम्मेदवारी ब्यूगु दु । जसपा नेपालया चन्द्र महर्जनया नेतृत्वय् वडा सदस्य पदय् माओवादी केन्द्रया नहकुल महर्जन व नेकपा (एस) या मनिष हमाल चुनावी मैदानय् कुहांवःगु दु ।

स्वंगू दल जूसां सकसिगु चुनाव चिं धाःसा कुसा हे दु ।

ज्याझ्वलय् न्ववासें गठबन्धन दलया उम्मेदवारतय्सं वडाबासीयात शिक्षा, स्वास्थ्यलिसेंया आधारभूत आवश्यकताय् वडाबासीया पहुँच सहज दयेकेगु बचं नं ब्यूगु खः ।

Detail page ad