arin JS
Home page Ad

एसईई परिक्षार्थीयात अभिभावकतयसं ध्यान बीत विज्ञतय् सुझाव

Jheegu Sah – Biraj,    २०७९ जेठ २२, आइतबार    वर्गीकृत समाज

एसईई परिक्षा बियाः च्वनाच्वंपिं मस्तयत मांअबु विशेष ई बीमाःगु खँय् विज्ञतय्सं बः ब्यूगु दु ।

ज्यापु महागुथि नेपाः येँ महानगर समितिया ग्वसालय् येँय् जूगु ज्यापु समदुायया एसईई परिक्षार्थीतयत शैक्षिक लिसें अभिभावकतयत अभिभावकत्व परामर्श ज्याझ्वलय् विज्ञतय्सं थथे धाःगु खः ।

ज्याझ्वलय् विज्ञतयसं एसईई परिक्षा धुंकाः विद्यार्थीतयसं थःगु भविष्ययात बिचाः यानाः न्ह्याःवनेमाःगु जूगुलिं अभिभावतयसं विशेष कथं मस्तयत ई बियाः उपिंलिसे सहलह यानाच्वनेमाःगु धाःगु खः ।

ज्याझ्वःया ब्वतिमि विद्यार्थी व अभिभावकतयत शैक्षिक परामर्शदाता इन्द्र गुरुङ र राजेश्वरी श्रेष्ठ गुरुङं शैक्षिक व अभिभावकत्व सम्वन्धि परामर्श ब्यूगु खः । लिसें थीथी विद्यालयया प्रधानाध्यापकं नं न्हापाया अनुभवया लिधंसाय् थःथःगु खँ इनादीगु खः ।

‘एसईई परिक्षा धुंकाः विद्यार्थीतयसं थःगु भविष्य, करिअर बिचाः यानाः विषय ल्ययेमाः, थज्याःगु अवस्थाय् अभिभावकतयसं नं दबाब मब्युसे सल्लाह सुझाव, मार्गनिर्देशन बीमाः । थुगु इलय् अभिभावकिय भूमिका नं अतिकं महत्त्वपूर्ण धइगु खँ अभिभावकं ल्वःमंके मज्यू’ परामर्शदाता गुरुङं धयादिल ।

विद्यार्थीतयसं मेपिन्सं धाःगु खँय् मवंसे थःगु इच्छा, कार्य कुशलता व क्षमतायात स्वयाः शैक्षिक यात्रा न्ह्यःने यंकेत छ्याता बियादिल ।

एसईई विद्यार्थीया लागिं शैक्षिक परामर्श ज्याझ्वःत जुइगु याःसां कुशल अभिभावकत्व तालीम खास हे मजूगु दावी ज्याझ्वः कजि दिनेश महर्जनं यानादिल ।

‘एसईई धुंकाः विद्यार्थीया न्हूगु शैक्षिक यात्राय् अभिभावक नं गम्भीर जुइमाः, कुशल अभिभावकत्व परामर्शया सवालय् थ्व न्हापांगु ज्याझ्वः हे जुइमाः’ ज्याझ्वः कजिलिसे समृद्धि स्कूलया प्रशासकिय निर्देशक महर्जनया धापू खः ।

Detail page ad