arin JS
Home page Ad

कलाकार एकाराम सिंह मन्त

Jheegu Sah – Biraj,    २०७८ जेठ २४, सोमबार    वर्गीकृत समाज

कलाकार लिसें ईतिहास, संस्कृति अन्वेषक एकाराम सिंह मन्त ।

कोभिड १९ संक्रमण जुयाः भुइजःसिस्थित करुणा अस्पतालय् वासः याकाच्वनादीम्ह सिंह थौं न्हिनय् ४ः३० ताः इलय् मदुगु खः । कोभिड पोजेटिभ खनेदयेधुंकाः वयकः उगु अस्पतालय् वासः याकाच्वनादीगु खःसा वासः यायेगु झ्वलय् वयकः थौं मदुगु खः ।

वंगु शुक्रबाः जक वयकःया उसाँय् अवस्था बांलानावःगु धाःगु खः । तर उगु हे दिनय् हाकनं स्वास्थ्यय् समस्या खनेदयेधुंकाः भेन्टिलेटरय् तयाः उपचार न्ह्याकूगु खः ।

वयकःया अन्त्येष्टि नेपाली सेनां याइगु परिवार श्रोतं जानकारी ब्यूगु दु ।

मदुम्ह सिंह नेपाली चित्रकला ख्यलय् छम्ह बांलाःम्ह व फरक कथंया प्रस्तुति बीफुम्ह कलाकार कथं म्हस्यू । वयकलं च्वयादीगु शंखधरया छपाः किपा व आशाकाजी पात्रया च्वकिपा छगू इलय् चर्चाया शिखरय् च्वंगु खः ।

नेपाली संस्कृतिया बारे अध्ययन अनुसन्धान याये तसकं न्ह्याःम्ह सिंहयात स्वनिगःया स्थानीय कला संस्कृतिया ज्ञाताया रुपं नं काः ।

येँ महानगरपालिकाया तत्कालीन प्रमुख केशव स्थापितया पालय् रन्जना, देवनागरी व रोमन लिपिं त्वाःया नांया साइनबोर्ड तःबलय् थुगु ज्याय् वयकः सक्रिय जुयादीगु खः ।

अथे हे, येँ महागरपालिकां थौंकन्हय् तिनि लागू याःगु स्थानीय पाठ्यक्रम ‘येँ देय् म्हसीके’ या छगू निसें च्यागू तगिंतक्कया पाठ्यसफुतिइ नं वयकलं हे चित्र कियादीगु खः ।

वयकलं थीथी लोकबाखंया कमिक्स नं पिथनादीगु दु ।

५४ दँया सिंहया जहानलिसें छम्ह काय् व निम्ह म्ह्याय् दी ।

Detail page ad