arin JS
Home page Ad

मिसा साहित्यकारतये भर्चुअल मुनाय् संस्थाया उलेज्या

Jheegu Sah – Bijay Ratna ,    २०७८ आषाढ १५, मंगलबार    वर्गीकृत साहित्य

 

हनेबहःम्ह वरिष्ठ साहित्यकार कवयित्री नारायण देवी श्रेष्ठया मूपाहांसुइ मिसा साहित्यकार मुना  आइतवाः जुम मार्फत भर्चुअल रुपं क्वचाःगु दु । उगु हे ज्याझ्वलय्  मिसा साहित्यकार मुना नांयागु संस्थाया उलेज्या वयकः मयजु श्रेष्ठजुं यानादीगु खःसा   वयकलं हे साहित्य गोष्ठीया उलेज्या नं यानादीगु खः ।  मिसा साहित्यकार मुना संस्थाया नायः अञ्जना ताम्राकारया सभापतित्वय् न्ह्याःगु ज्याझ्वलय् नायः मयजुं  उपस्थित सकसितं  लसकुस यायगु ज्या नं यानादीगु खः । नापं वयकलं संस्थाया बारे बःचाहाकःगु खँ नं तयादीगु खः ।  मिसा साहित्यकारतय्गु उत्थान यायगु आज्जु तयाः नीस्वंगु थुगु संस्थाया न्वकु विमलप्रभा बज्राचार्यं संस्थाया म्हसीका   व छ्याञ्जे विमला मानन्धरं न्ह्याःकूगु उगु ज्याझ्वलय् नेपालभाषा ख्यःया थीथी व्यक्तित्व पिन्सं विशेष पाहांया कथं थःथःगु नुगः खँ नं प्वंकादीगु खः । 

थुकथं नुगः खँ प्वंकेगु झ्वलय् थौंकन्हय् विदेशय् च्वनादीम्ह संस्थाया संरक्षक डा. ज्योतिप्रभा तुलाधर, विशेष पाहांपिं प्रा.डा सुन्दरकृष्ण जोशी, नेवाः न्ह्यलुवा मल्ल के सुन्दर, प्रा.प्रेमशान्ति तुलाधर, बाखंच्वमि प्रकाश कुमारी प्रधान, बाखं च्वमि सुवर्ण केशरी चित्रकार, आधुनिक कवि डा. आनन्द जोशी लगायतं थःथःगु खँ तयादीगु खः ।  झ्वलय् वक्तापिन्सं नेपालभाषाया साहित्यिक संस्थात निस्वना लिपा वना हानं फ्यासुना वंगु आपालं दयाच्वंगु खँ तकं न्ह्यथना दीगु खःसा थुकथंया अवस्थायात तकं ध्यानय् तयाः थुगु संस्थायात निरन्तरता बिइगु ज्या यानावनेमाःगु धारणा नं प्वंकादीगु खः । नापं झीसं संस्था निस्वने धुंकाः न्हूपुस्तायात हस्तान्तरण याना वनेगु सोच नं दयका वनेमाः धका नं खँ पिदंगु खः । 

 थुकथं हे उगु मुनाय् न्हूपिं व पुलांपिं  नेपालभाषाया थीथी साहित्यकारपिन्सं  उत्साहजनक रुपं थःथःगु रचना नं ब्वना दीगु खः । 

 उगु  मुनाय् ब्वंगु रचना मध्ये बाखं विधायात कयाः  धु्ुब मधिकःमिं  समिक्षा यानादीगु खःसा  साहित्यया थीथी  पक्षयात कःघाना डा. ज्योति तुलाधरं नं समिक्षा यानादीगु खः ।   ज्याझ्वलय् संस्थाया न्वकु दिव्या ताम्राकारं सुभाय् सुभाय् बियादीगु खः ।  

   साहित्यकार मय्जु अन्जना ताम्राकारजुया नायःसुइ ’मिसा साहित्यकार मुना’  नीस्वने ज्या  जूगु  थुउगु संस्थाय् नपम्ह न्वकु  दिब्या ताम्राकार व बिमलप्रभा बज्राचार्य, मू छ्याञ्जे बिमला मानन्धर, दांभरीं भवानी तुलाधर, ल्यूछ्याञ्जे राजेस्वरी राजोपाध्यय व ल्यू दांभरी रेणु श्रेष्ठजुपिं च्वनादीगु दु । थ्व पुचःया तातुना धइगु साहित्यया बिषयय् सहलह ब्याकेगु, मिसा साहित्यकारपिनिगु लेखन क्षमता थपू यायेगु, मिसा च्वमिपिनिगु जक सृजना दुथ्याकाः सफू पिकायेगु लगायतया  दुउगु खँ नं उगु भर्चुअल मुनाय् जानकारी बिउगु दु ।

 

Detail page ad