arin JS
Home page Ad

यलया ओकुबहालय् कला ब्वज्या न्ह्यात

Jheegu Sah – Biraj,    २०७८ आश्विन १२, मंगलबार    वर्गीकृत तजिलजि

यलया रुद्रवर्ण महाविहार ओकुबहालय् स्वन्हुयंकया कला ब्वज्या न्ह्याःगु दु । यल महानगरपालिका हस्तकला प्रवद्र्धन समिति व यल महानगरपालिका ६ वडा कार्यालय पर्यटन प्रवद्र्धन समितिं मंकाः रुपं कला ब्वज्याया ग्वसाः ग्वःगु खः ।

सोमबाः ओकुबहाः यतालिबिइ नेपाल ललितकला प्रज्ञा प्रतिष्ठानया कुलपति केके कर्माचार्यं प्रदर्शनीया शुभारम्भ यानादिल ।

विश्व पर्यटन दिवस २०२१ या अवसरय् याःगु ब्वज्याय् यलया ६० दँ पुलेधुंकूपिं व मदयधुंकूपिं मुर्धन्य कलाकारतय् हस्तकलाया सामग्री तयातःगु दु ।

ब्वज्याय् मदुम्ह कलाकार राजकुमार शाक्यया पूमवंनिगु म्हगस ७२ फिट तःधिकःगु भैरवया ख्वाःपाःया मूर्तिया थीथी ब्व नं तयातःगु दु ।

एकान्तकुना रिङरोडं १० किलोमिटर तापाःगु छम्पि डुकुछापया फिसिङफाँटय् तइगु उगु मूर्तिया दयेकेसिधःगु थीथी ब्व ब्वज्याय् तयातःगु दु । छुं दिनं उगु सामग्री छम्पिइ यंकाः मूर्ति दयेकेज्या लिपांगु चरणया ज्या जुइगु मूर्तिया परिकल्पनाकार राजेश अवालें धयादिल ।

पुलांगु पुस्ताया कला, सीप व प्रतिभा न्हू पुस्तायात लःल्हायेगु आज्जुलिसें ब्वज्याया ग्वसाः ग्वयागु ग्वसाः खलकं धाःगु दु ।

‘छुं नं मूर्ति वा मेगु सामग्री दयेकेत छुं नं कथंया धातु नायेकेत पुलांपिं कलाकारयात थर्मोमिटर वा आधुनिक प्रविधि म्वाः, मिखां स्वयाः धायेफु । अग्रज कलाकारया थज्याःगु हे प्रतिभा न्हू पुस्तायात लःल्हायेगु जिमिगु आज्जु खः’ कलाकार सन्तकुमार शाक्यं धयादिल ।

क्रोधकला शिरोमणि प्राज्ञ कालु कुम्हाःया मेकसम्बरया मूर्ति नं ब्वज्याया प्रमुख आकर्षण जूगु दु । उकिया नापं प्रदर्शनीइ द्वःछिपा ल्हाः दुम्ह सहस्रभुजा लोकेश्वर, मदुम्ह कलाकार सिद्धिराज शाक्यया तुलाद्यःलिसें करीब ३० कलाकारया श्रृजना तयातःगु दु ।

ब्वज्या बुधबाःतक्क जुइ ।

Detail page ad