arin JS
Home page Ad

सिद्धार्थ वनस्थलीया पूर्व विद्यार्थीपाखें छत्रपाटी अस्पतालयात ग्वाहालि

Jheegu Sah – Biraj,    २०७८ जेठ २७, बिहिबार    वर्गीकृत समाज

येँया क्षेत्रपाटीस्थित छत्रपाटी निःशुल्क चिकित्सालय अस्पतालयात सिद्धार्थ बनस्थली स्कूलया पूर्व विद्यार्थीतय्सं आर्थिक ग्वाहालि ब्यूगु दु ।

सिद्धार्थ बनस्थली स्कूल ४७ साल ब्याच पुचलं अस्पतालय् अक्सिजन प्लान्ट तयेत छगू लखत्या तका ग्वाहालि याःगु खः । बुधबाः अस्पताल परिसरय् हे वनाः पूर्व विद्यार्थीतय् पुचलं व धेबा बराबरया चेक अस्पतालया नायः डा. मनोजमान श्रेष्ठयात लःल्हात ।

व झ्वलय् अस्पतालया नायः डा. श्रेष्ठं ग्वाहालिया लागिं कृतज्ञता प्वंकुसें संक्रमितयात स्तरीय स्वास्थ्य सेवा बीगु नितिं अस्पताल चान्हि खटे जुयाच्वनागु धयादिल ।

‘अत्याधुनिक प्रविधिलिसेंया आइसीयू, पोर्टबेल एक्सरे मेसीनलिसें विरामीयात स्तरीय सेवा बीत मालीगु अत्याधुनिक मेसीन व प्रविधि थन जडान यानागु दु, आः अक्सिजनया समस्या मजुइमा धकाः अक्सिजन प्लान्ट तयेत्यनागु दु’ श्रेष्ठया धापू खः ।

बिरामीयात उपचारलिसें खाना, वासः तकं निःशुक्ल उपलब्ध याकाच्वनागु श्रेष्ठं जानकारी बियादिल ।

सिद्धार्थ वनस्थलीया पूर्व विद्यार्थीतय् प्रतिनिधित्व यानाः नवासें दिपक जोशीं कोभिड महामारीया शुरुवाती दिनंनिसें देय्या थीथी थासय् वनाः ग्वाहालि यानावयागु जानकारी याकादिल ।

व हे ग्वाहालिया निरन्तरताया झ्वलय् डा. सोना श्रेष्ठ, डा. निरज श्रेष्ठ, डा. मिरु गुरुङ व डा. सपना श्रेष्ठया न्ह्यलुवाय् येँया पुलांगु बस्ती क्षेत्रपाटी थ्यंकःवयागु जोशीं धयादिल ।

ज्याझ्वलय् पूर्व विद्यार्थी पुचःया दिपिन श्रेष्ठ, सरल प्रधान, निरन्जन श्रेष्ठ, सर्जु श्रेष्ठ, राजिव श्रेष्ठ, प्रमोद सुवाल व भुपेन्द्र श्रेष्ठलिसेंया उपस्थिती दुगु खः ।

Detail page ad