arin JS
Home page Ad

हलिं नेवाः न्ह्यसः लिसः कासाय् त्याःपिंत सिरपाः लःल्हात

Jheegu Sah – Bijay R,    २०७८ मङ्सिर १३, सोमबार    वर्गीकृत पुलुपालु

 वल्र्ड नेवाः अर्गनाइजेसन (डब्लुएनओ) या ग्वसालय् जुउगु न्हापांगु न्ह्यसलिसः कासाय् त्याःपिंत वंगु शनिवाः छगू ज्याझ्वःया दथुइ सिरपाः व दसिपौ लःल्हायेगु ज्या जुल ।

विश्वन्यंकं न्यना वनाच्वंपिं नेवाःतय्गु अन्तर्राष्ट्रिय संगठन डब्लुएनओ छगू दशक क्यंगु लसताय् थुगु न्ह्यसः लिसः कासा जूगु खः ।

च्यागू निसें झिंनिगू तगिं तकया ब्वँमिपिनि दथुइ वंगु प्यला न्ह्यवंनिसें न्ह्यानाच्वंगु ‘न्हापांगु हलिं नेवाः न्ह्यसः लिसः कासाय् त्याःपिंत सिरपाः व दसिपौ लःल्हायेगु नापं ब्वति कयादीपिंत व थीथीकथं ग्वाहालि यानादीपिंत मतिनाया चिं लःल्हायेगु ज्याझ्वःलिसें थुगु कासा औपचारिक रुपं क्वचाःगु खः ।वंगु शनिवाः जगतसुन्दर ब्वनेकुथिइ डब्लुएनओया नायः सिजन श्रेष्ठ (अमेरिका)या सभापतित्वय् न्ह्याःगु ज्याझ्वलय् मूपाहांकथं संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठ झायादीगु खःसा विशेष पाहाकथं येँ महानगरपालिका उपप्रमुख हरिप्रभा खड्गी श्रेष्ठ झायादीगु खः ।

अथे हे ज्याझ्वलय् पाहाकथं दकलय् न्हापां हाइस्कुल स्तरय् नेपालभाषा न्ह्यसः लिसः कासा न्ह्याकादीम्ह परोपकार उच्च माध्यमिक विद्यालयया पुलांम्ह प्रधानाध्यापक लिसें साहित्यकार हितकरवीर सिंह कंसाकार, न्ह्यसः लिसःकासाया निर्णायकद्वय नेवाः न्ह्यलुवा नापं साहित्यकार मल्ल के. सुन्दर व कवयित्री प्रतिसरा साय्मि, नेवाः देय् दबूया नायः नरेश ताम्राकार, वल्र्ड नेवाः अर्गनाइजेसन नेपाः देय् मूकवःया सल्लाहकार पुष्करभक्त माथेमा पाहांकथं झायादीगु खः ।

न्ह्यसः लिसः कासाय् न्हाप जुइत ताःलाःगु यलबुक स्वांयात ६०० अमेरिकी डलर, लिउ लाःगु गुलाफ स्वां पुचःयात ४५० अमेरिकी डलर, लियांलिउ लाःगु सिन्हः स्वां पुचःयात ३०० व प्यंगूगु थासय् लाःगु अजूस्वां पुचःयात १५० अमेरिकी डलर नापं दसिपौ लःल्हाःगु खः ।

अथे हे कासाय् ब्वति काःगु प्रत्येक पुचःयात नं १५ अमेरिकी डलरलिसें दसिपौ लःल्हाःगु खः ।नेपाःया राष्ट्रिय गान व नेवाः राष्ट्रिय म्येँ हायेकाः शुरु जूगु ज्याझ्वलय् क्यानाडाय् च्वनादीम्ह रञ्जना सैंजूं सितारय् मंगलधुन न्यंकादीगु खःसा नांजाःम्ह सरोदवादक सुदर्शन राजोपाध्यायं सरोदय् नेवाः म्येँया धुन थानाः न्यंकादीगु खः ।

वाङ्मय शताब्दीपुरुष सत्यमोहन जोशीं भिंतुना सन्देश बियादीगु ज्याझ्वःलय् न्ह्यसः लिसः कासाया कजि विमलमान श्रेष्ठ (क्यानाडां) लसकुस यानादीगु खःसा न्ह्यसः लिसः कासा निर्माण समितिया कजि साहित्यकार केशरमान शाक्य (अमेरिका) मूपाहां, पाहां, निर्णायक मण्डलपाखें नुगःखँ तयादीगु खः । वंगु गुंला (भदौ)निसें न्ह्याःगु कासाय् नेपाःलिसें अमेरिका, क्यानाडा, बेलायत, आयरल्याण्ड लगायतया देय्पाखें नीगू पुचलं ब्वति काःगु खः ।

Detail page ad