arin JS
Home page Ad

हर्षरत्न—लक्ष्मीप्रभा लुमन्ति दिवस व उदाय् म्युजियमया बुसादँ हन

Jheegu Sah – Bijay Ratna ,    २०७८ माघ १, शनिबार    वर्गीकृत समाज

येँ महानगरपालिकाया मेयर  शाक्यजुं येँ महानगरपालिकां सम्पदायात संरक्षण यायगु मनसुवाकथं
सम्पदा कःघाना दयकेगु ज्या याना बलय् थीथी कथंया पंगःत वयाच्वंगु खँ न्ह्यःथनादिल 
 
हर्षरत्न—लक्ष्मीप्रभा लुमन्ति दिवस व उदाय् म्युजियमया बुसादँ शनिवाः ध्यःचाहु सन्हुया दिनय् असंया उदाय् छेँय् हंगृु दु ।
येँ महानगरपालिकाया मेयर विद्यासुन्दर शाक्यया मूपाहांसुइ जूगु थुगु ज्याझ्वलय् उदाय् छेँया छेँ थुवाःपिं हर्षंरत्न तुलाधर व लक्ष्मीप्रभा तुलाधरपिनिगु किपाय्  मूपाहां पाहांपिन्सं स्वांमा क्वखाय्का वयकपिन्त श्रद्धान्जलि देछागु खः  ।
थुगु ज्याझ्वलय् उदाय् समाजया न्वकु डा.प्रेमरत्न स्थापितजुं  उपस्थित सकसितं लसकुस यायेकथं न्वचु  बियादीगु खः ।
उदाय् समाजया मूदुजः सुमित्रा तुलाधरं न्ह्याकादीगु थुगु ज्याझ्वलय् ज्याझ्वःया मूपाहां येँ महानगरपालिकाया मेयर  शाक्यजुं येँ महानगरपालिकां सम्पदायात संरक्षण यायगु मनसुवाकथं सम्पदा कःघाना दयकेगु ज्या याना बलय् थीथी कथंया पंगःत वयाच्वंगु खँ न्ह्यःथनादिसें  बांलागु मनं ज्या याना वनेगु् यानावन धाःसा सुं नाप नं ग्यायमालि मखु धैगु धारणा तयादीगु खः ।
उगु लुमन्ति दिवस व उदाय् म्यूजियमया बुसादँया ज्याझ्वलय् उदाय् म्यूजियमया कजि डा.सुमन कमल तुलाधरं उदाय् समाजं चायकूगु उदाय् म्युजियम उदाय्तयगु जक मखु धयादिसें थुकियात विस्तारं सकल नेवाःतय्गु संस्कृतियात न्ह्यब्वयेगु जुइ धका नं धयादिल ।
थुकथं हे ज्याझ्वलय् सभापतिया थासं उदाय् समाजया नायः डा.रुपज्योति कसाःजुं थःगु नुगः खँ प्वंकेगु झ्वलय् झी नेवाःतय्गु कला, संस्कृतिया नाप नापं झीगु मांभाय्या रुपय् दुगु नेवाः भाय्यात गथे याना संरक्षण याना वनेमालि धकाः नं बिचाः याय्माःगु खँ कनादिल ।
नापं वयकलं ल्हासा नेवाःतय्गु बारे नं खँ कनादीगु खःसा थःम्ह ल्हासाय् यानागु व्यापारया लुमन्ति नं न्ह्यथना दीगु खः ।  ज्याझ्वलय् मूपाहां भाजु मेयर शाक्यजुं उदाय् म्यूजियमया भर्चुअल रुपं चाहुले ज्याया नं उलेज्या यानादीगु दु । थु्कथं हे उगु ज्याझ्वलय् उदाय्तसें ल्हासाय् वना व्यापार याःवंलय्या आपालं महत्वपूर्ण किपा व भ्वंत न हयातःगु खः । ल्हासाय् उदाय्तसें गुकथं व्यापार याइ धैगु बारे छगू कुथि हे चायका तःगु तकं अन ब्वयातःगु खः । ज्याझ्वःया मूपाहां मेयर भाजु शाक्यजुयात म्यूजियमया कजि डा. सुमन कमल तुलाधर व सिद्धार्थमान तुलाधरपिन्सं स्वयम्भू ल्ह्वंबलयया  व ल्हासाया थीथी पक्षया बारे कनादीगु खः । उदाय् छेँया रुपय् उदाय् समाजया असंय् च्वंगु थुगु छेँ स्वर्गिय हर्षरत्न तु्लाधर व लक्ष्मीप्रभा तुलाधरपिनिगु खः । लिपा वय्कःपिनि हकवालापिं पद्मज्योति कसाः, डा. रुपज्योति कसाः व दानरत्न तुलाधरपिन्सं थुगु छेँ उदाय् समाजयात दान यानादीगु खः । अन हे उदाय्तय्गु गुंगु थरया झिगू खलः पुचःपिनिगु म्हसीका ब्वय्कथं उदाय् छेँय् उदाय् म्यूजियम चाय्कातःगु दु । थुगु म्युजियमय् गुंगू थरया झिगू खलः पुचः कंसाकार, असं तुलाधर, न्यत तुलाधर, स्थापित, ताम्राकार, सिन्दुराकार, बनिया, सिख्राकार, शिलाकार व सेलालिकपिनिगु परम्परागत लजगाया चिं खनेदइकथं उदाय्तय्सं छ्यला वयाच्वंगु हलंज्वलंत ब्वयातःगु दु । थुगु उदाय् म्युजियमया  वि सं २०७० सालय् ध्यःचाकु सन्हु कुन्हु  मूपाहां शताब्दि पुरुष  संस्कृतिविद् डा.सत्यमोहन जोशी, उदाय् समाजया संरक्षकद्धय कुलवीरसिंह तुलाधर व दव्यमानसिंह तुलाधरजुपिन्सं मंकाःरुपं   उलेज्या यानादीगु खः । 
 
समाचार स्रोत सुगतरत्न सिन्दुराकार
 
 
 
Detail page ad