स्रष्टा हरि प्रसाद वैद्य सम्मानित
Jheegu Sah – Bijay Ratna , २०७९ बैशाख ११, आइतबार वर्गीकृत राष्ट्रिय
वास्तुकला ज्ञाता, वरिष्ठ चित्रकार व भ्वाइलेन गुरू हरि प्रसाद वैद्यं नेपालमण्डल कला व संस्कृतिया धनी देश जूसां नेवाः तजिलजि व कलाया अवहेलना जुया च्वंगु दु धका धयादिल ।
स्रष्टा वैद्य नेपाःया संगीतयात भारतीय संगीतया छगू अङ्ग धका ब्वलंका तःगु भ्रम चिइका नेपाःया संगीत यूरोप , अमेरिका व अष्ट्रेलिया थ्यंकेगु ज्याया न्ह्यलुवा खः ।
नेपालया संगीत यूरोप, अष्ट्रेलिया, चीन व भारतय् न्ह्यब्वया नेपाःया म्हसिका देश विदेशय् थ्यंकेत यानादीगु योगदानयात लुमंकुसे शनिवार नेवाः ग्वाहालि पुचः पाखें सम्मान याःगु खः ।
संगीतज्ञ, भ्वाइलेन गुरु, सम्पदाया ज्ञाता, चित्रकला च्वयादिइम्ह वरिष्ठ कलाकार भाजु हरिप्रसाद वैद्यजुयात संङ्घीयमामिला व सामान्य प्रशासन मन्त्री मा. राजेन्द्रप्रसाद श्रेष्ठजु पाखें दाेसल्लां न्ययेकाः हनेेज्याझ्वः जूगु खः । वय्कःस्रष्टाया एकल चित्रकला प्रदर्शनी ज्याझ्वः उलेज्या न मूपाहाँ मन्त्री श्रेष्ठं यानादिल ।
सम्मान ज्याझ्वःया नापनापं नेवाः ग्वाहालि पुचः नेपाः १३ व १५ वडा येँया ग्वसालय् बैशाख १०, ११ व १२ गते स्वन्हु यंकं नेपाल कला परिषद, बबरमहलय् वयकलं सृजना यानादीगु चित्रकला प्रदर्शनी न्ह्यागु दु । सम्पदा निर्माणय् सम्पदा व वास्तुकलाविदया ज्वमदुगु भूमिका निर्वाह यानाच्वनादीम्ह वयक ने सं १०५७य् जन्म जुउगु खःसा वयकः आः ८५ दँ दयेधुकुगु दु।
भ्वाइलिन गुरु कथं बिस्कं म्हसिका दुम्ह सर्जक बैद्य न स्यनातःपिन्स उगु ज्याझ्वलय् भ्वाइलन संगीत प्रस्तुति व चित्रकला प्रदशनी न्ह्यब्वःगु खः ।
