arin JS
Home page Ad

सुरेन्द्रभक्त श्रेष्ठयात हलिं नेवाः दबू नेपाः देय् मूकवःया नायः ल्यल

Jheegu Sah – Bijay Ratna ,    २०७९ बैशाख ११, आइतबार    वर्गीकृत पुलुपालु

 
डा. महेशमान श्रेष्ठयात ‘हलिं नेवाः, नेपाः’ हना सिरपालं छायपिल
 
हलिं नेवाः दबू नेपाः देय् मूकवःया न्हापांगु दँमुँज्या स्वयम्भु बैंक्वेटय्  क्वचाःगु दु ।
 
संघीय मामिला तथा स्थानीय प्रशासन मन्त्री राजेन्द्र प्रसाद श्रेष्ठया मूपाहाँसुइ सम्पन्न जुउगु उगु तःमुन्ज्याँ थ्व कवःया न्हूम्ह नायः कथं सुरेन्द्र भक्त श्रेष्ठयात ल्यःगु दु  ।
 
तःमुन्ज्याय् मूपाहाँ श्रेष्ठं थःगु नुगःखँ तयेगु झ्वलय् नेपाः देसय् निसःदँ स्वयां  न्ह्यवःनिसें नेवाः सभ्यताया विकास जूगु खःसां नेवाःतय्त राज्यसत्तां याःगु दमनया हुनिं नेवाःत लिउने लाःगु बिचाः प्वंकादिल।
 
वय्कलं हलिमय् न्यंकं च्वना च्वंपिं नेवाःतय्त संगठित यायेगु तातुना निस्वंगु हलिं नेवाः दबू संस्थां हलिमय् न्यंकभनं नेवाः जातिया एकताया लिसें थुकिया उत्थानया निंतिं पलाः न्ह्याकेमाःगु बिचाः प्वंकादिल। उगु ज्याझ्वलय् नेवाः न्ह्यलुवा डा. महेशमान श्रेष्ठयात ‘हलिं नेवाः, नेपाः’ हना सिरपालं छाय्पिउगु खः ।
 
वय्कलं नेवाःतय्त संगठित यायेगु लिसें नेवाः जातिया उत्थानया निंतिं ज्वःमदुगु योगदान बियादीगुलिं वय्कःयात उगु हना लःल्हाःगु खः। ज्याझ्वलय् नेवाः देय् दबूया निवर्तमान नायः नरेश ताम्राकार, हलिं नेवाः दबू नेपाल च्याप्टरया पुलांम्ह नायः नरेन्द्रभक्त हाडा, केन्द्रीय न्वकू रजनी प्रधान, केन्द्रीय मूछ्याञ्जे समन्त बज्राचार्यपिसं भिंतुना देछानादीगु खः ।
 
नेपाः देय् मूकवःया अध्यक्ष शाक्य सुुरेनया सभाध्यक्षताय् जूगु उलेज्या ज्याझ्वलय् दुजः रमेशमान मुनिकारं सुभाय् देछाःगु खःसा ल्यूदांभरिं सुदयराज शिलाकारं ज्याझ्वः न्ह्याकूगु खः। दँमुँज्यां सुरेन्द्रभक्त श्रेष्ठ अध्यक्षय् निर्विरोध निर्वाचित जुगु खः । अथेहे उपाध्यक्षय् रमेशमान मुनिकार, राधेश्याम त्वायनाबासु व श्यामप्रसाद श्रेष्ठयात ल्यःगु खः । मूछ्याञ्जे सुदयराज शिलाकार, छ्याञ्जे कस्तुरी श्रेष्ठ, दांभरिं अञ्जना ताम्राकार, ल्यूदांभरिं मंगलरत्न ताम्राकार यात ल्यःगु खः।
 
अथेहेतुं दुजलय् शान्ति वैद्य, शोभा श्रेष्ठ, भागवत नरसिंह प्रधान, विकास महर्जन, खगेन्द्र प्रसाद जोशी, धर्मदेव महर्जन, पद्मलक्ष्मी ताम्रकार ल्यःगु खः। ज्यासना पुचः ल्यज्या न्ह्यः जूगु बन्द सत्रय् छ्याञ्जे रत्न काजी महर्जनं प्रगति प्रतिवेदन व दांभरिं सुरेन्द्रभक्त श्रेष्ठं आर्थिक प्रतिवेदन न्ह्यब्वःगु खःसा नायः शाक्य सुरेनं न्ह्यब्वःगु विधान संशोधन प्रस्ताव पारित याःगु खः।
Detail page ad